मुंबई : अहमदाबादमधून लंडनला निघालेल्या एका विमानाला टेकऑफनंतर अवघ्या काही वेळातच भीषण अपघात झाल्याने देशभरात शोककळा पसरली आहे. या दुर्दैवी घटनेत २६० हून अधिक लोकांचा मृत्यू झाला, ज्यात बीजे मेडिकल कॉलेजच्या विद्यार्थ्यांचाही समावेश आहे. विमान थेट त्यांच्या वसतिगृहाच्या मेसवर कोसळले. या हृदयद्रावक घटनेने संपूर्ण देश हादरला आहे. विमानात प्रवासी आणि क्रू मेंबरसह २४२ लोक होते. विशेष म्हणजे, या विमानाचे पहिले अधिकारी (फर्स्ट ऑफिसर) क्लाईव्ह कुंदर हे अभिनेता विक्रांत मेस्सी यांच्या कुटुंबाचे मित्र होते.
विक्रांत मेस्सी या दुर्दैवी अपघातात आपल्या कुटुंबातील मित्राला गमावल्याने दुःखी आहे. 'माझ्या काकांनी त्यांचा मुलगा गमावला हे ऐकून मला आणखी वेदना होत आहेत,' असे त्याने म्हटले आहे.
अहमदाबादमधील या भीषण अपघातानंतर अभिनेता विक्रांत मेस्सीने सोशल मीडियावर आपलं दुःख व्यक्त केलं. त्याने सांगितलं की, विमानात पहिले अधिकारी म्हणून काम करणारे त्याचे कौटुंबिक मित्र या अपघातात मृत्युमुखी पडले आहेत.
विक्रांत मेस्सीने आपल्या इंस्टाग्राम स्टोरीमध्ये लिहिलं आहे, 'आज अहमदाबादमध्ये झालेल्या या अकल्पनीय आणि दुःखद अपघातात ज्यांनी आपले प्राण गमावले, त्यांच्या कुटुंबीयांसाठी आणि प्रियजनांसाठी माझं हृदय तुटतंय. मला हे जाणून आणखी वेदना होत आहेत की, माझे काका, क्लिफर्ड कुंदर, यांनी त्यांचा मुलगा क्लाईव्ह कुंदरला गमावले आहे. क्लाईव्ह कुंदर हे त्या दुर्दैवी विमानाचे पहिले अधिकारी होते. देव तुम्हाला आणि तुमच्या कुटुंबाला, काका, तसेच या घटनेने ज्यांना खोलवर धक्का बसला आहे, त्या सर्वांना शक्ती देवो.'