नवी दिल्ली: हनिमूनसाठी मेघालयात गेलेल्या राजा रघुवंशी आणि सोनम रघुवंशीचा एक नवीन व्हिडीओ आता समोर आला आहे. यामध्ये सोनम रघुवंशी (Sonam Raghuvanshi) आणि राजा रघुवंशी (Raja Raghuvanshi) अगदी स्वच्छ समोरून येताना दिसतात, राजा रघुवंशीच्या हत्याकांड प्रकरणात हा व्हिडिओ एक जबरदस्त पुरावा ठरू शकतो. मेघालय फिरायला गेलेल्या देवसिंग या ट्रॅवल व्लॉगरच्या कॅमेऱ्यात सोनम आणि राजा दिसून आले आहेत. त्यात सोनम पुढे, तर राजा पाठीमागून चालताना दिसत आहे.
सोनम रघुवंशी आणि राजा रघुवंशी यांचा हा व्हिडीओ मेघालयात फिरत असतानाचा आहे. देवसिंगदेखील त्याच ठिकाणी आणि त्याच वेळी मेघालयमध्ये भटकंती करत असताना, व्हिडिओ बनवत होता. त्यादरम्यान योगायोगाने सोनम आणि राजा त्याच्या समोरून गेले, आणि त्यामुळे ते देखील या व्हिडिओत शूट झाले. त्यात सोनमच्या हातात एक काठी दिसून येते. तर मागून राजा खांद्यावर जॅकेट आणि क्रॉस बॅग घेऊन जाताना दिसून येतो. या व्हिडिओनंतरच राजाची निर्घुण हत्या केल्याचा अंदाज आहे. कारण घटनास्थळी राजाच्या मृतदेहाशेजारी राजाने हेच कपडे आणि जॅकेट परिधान केले होते.
हाच तो व्हिडिओ
सोनम आणि राजाचा हा व्हिडीओ कुठला?
देवसिंगने त्याच्या कॅमेऱ्यात कैद झालेल्या सोनम आणि राजाचा व्हिडीओ सोशल मीडियावर शेअर केला आहे. हा व्हिडिओ पूर्ण पाहताना त्याला हे जोडपं दिसलं, आणि त्याला धक्काच बसला. "२३ मे रोजी मी मेघालयातील डबल डेकर रूट ब्रिजवर जाताना एक व्हिडिओ रेकॉर्ड केला होता. काल मी तो व्हिडीओ बघत होतो आणि मला इंदूरचे हे जोडपं शूट झाल्याचे दिसले. ती सकाळची ९.४५ वाजेदरम्यानची वेळ होती. आम्ही खाली उतरत होतो तर नोगरिएट गावात मुक्काम केल्यानंतर हे जोडप वर जात होतं." अशी माहिती त्याने या व्हिडिओ पोस्ट खाली दिली आहे.
देवसिंगने या पोस्ट खाली असेही म्हटले आहे की, 'मला वाटतं की हा या जोडप्याचा शेवटचा व्हिडीओ आहे. सोनमने तोच पांढरा टी शर्ट घातलेला दिसत आहे, जो राजाच्या मृतदेहाजवळ सापडला. मला आशा आहे की हा व्हिडीओमुळे मेघालय पोलिसांना तपास करायला मदत होईल.'