डीपीएस अर्थात दिल्ली पब्लिक स्कूलमधून आठवी उत्तीर्ण झालेला आणि नववीत नापास झाल्यानंतर आर्थिक कारणांमुळे शालेय शिक्षण सोडून मिळेल ते काम करत पैसे कमवू लागलेला रिंकू क्रिकेट छान खेळतो. आयपीएलमुळे रिंकूची क्रिकेट वर्तुळात ओळख निर्माण झाली आहे. असा हा लोकप्रिय होत असलेला क्रिकेटपटू लवकरच समाजवादी पक्षाच्या खासदार प्रिया सरोज यांच्यासोबत लग्न करणार आहे. हे लग्न होण्याआधीच नववी नापास रिंकू उत्तर प्रदेश सरकारचा शिक्षण अधिकारी झाला आहे. 'बेसिक शिक्षा निदेशक' यांनी आदेश काढून रिंकूला 'सीधी भर्ती नियमावली-२०२२' अंतर्गत शिक्षण अधिकारी म्हणून नियुक्त केले आहे.
नव्या हंगामाचे क्रिकेटचे वेळापत्रक येण्याआधीच रिंकूचे लग्न ठरले होते. आधी हे लग्न नोव्हेंबर २०२५ मध्ये वाराणसी येथे होणार होते. पण क्रिकेटमधील व्यस्त कार्यक्रमामुळे आता लग्नाची तारीख पुढे ढकलण्यात आली आहे. लग्नाची नवी तारीख लवकरच जाहीर होण्याची शक्यता आहे. याआधी रिंकू शिक्षण अधिकारी झाला आहे.
रिंकूच्या प्रेरणादायी प्रवासाने अनेक तरुणांना आत्मविश्वास दिला आहे. त्याला सरकारी नोकरी देऊन खेळाडूचा सन्मान करत असल्याचे उत्तर प्रदेश सरकारचे म्हणणे आहे. तर समाजवादी पक्षातील खासदाराच्या होणाऱ्या पतीला सरकारी नोकरी देऊन योगी आदित्यनाथ सरकार एक नवी राजकीय खेळी खेळत असल्याची चर्चा राजकीय वर्तुळात रंगली आहे.
मूळचा अलीगडचा असलेला रिंकू सिंह क्रिकेटपटू आहे तर त्याची होणारी पत्नी प्रिया सरोज ही मच्छलीशहर लोकसभा मतदारसंघाची समाजवादी पक्षाची खासदार आहे. प्रियाचे वडील तुफानी सरोज हे आधी समाजवादी पक्षाचे खासदार होते आणि सध्या ते जौनपूर जिल्ह्यातील केरकट विधानसभा मतदारसंघाचे आमदार आहेत.