ठाणे : मुंबईहून कसाऱ्याला येणारी लोकल रात्री ९ वाजताच्या दरम्यान कसारा रेल्वे स्थानकात येत असताना प्लॅटफॉर्मसाठी ट्रॅक बदलत असताना ट्रॅक लगत असलेल्या टेकडीवरील दरड लोकलवर कोसळली. यात दरवाजात उभ्या असलेल्या दोन प्रवाशांना गंभीर दुखापत झाली असून मोटरमनने सावधगिरीने लोकल कसारा स्थानकात आणली.
मंगळवारी रात्री ९च्या सुमारास मुंबईहून कसारासाठी येणारी लोकल प्लॅटफॉर्म नंबर चारवर येण्यासाठी ट्रॅक बदलत असताना अचानक लोकलवर दरड कोसळली. काही प्रमाणात दरड ही अर्ध्या लोकलमध्ये तर अर्धी दरड ट्रॅकलगत पडली. मातीचा मलबा, छोटे-मोठे दगड व छोटी झाड खाली आली.
या अचानक कोसळलेल्या दरडीमुळे दरवाजात उभे असलेले प्रवासी बाळू जाधव, रा. पंचशील नगर, तुकाराम जाधव रा. शिवाजी नगर कसारा हे गंभीर जखमी झाले. या दरडीमुळे गंभीर दुखापत झालेल्या जखमींना आपत्ती व्यवस्थापन टीम कसाराचे सदस्य प्रमोद वारंगुसे यांनी लोकलमधील सहप्रवाशांच्या मदतीने कसारा रेल्वे स्थानकात उपचारासाठी उतरवले.
दरड पडलेल्या घटनेची माहिती रेल्वेच्या आपत्कालीन नियंत्रण कक्षाला मिळाल्यानंतर त्यांनी घटनास्थळी रेल्वे ट्रॅकवर आलेले दरडीचे दगड बाजूला केले व ९ वाजून २१ मिनिटांनी मुंबईकडे लोकल रवाना केली.