बेलापूर : ‘डावीकडून उजवीकडे वळा’, ‘पुढे सरळ जा’… हे सांगणारा गुगल मॅप (Google Map) यावेळी प्राणघातक ठरला! बेलापूरमध्ये एका वाहनचालकाने गुगल मॅपवर दाखवलेला रस्ता घेतला आणि थेट गाडी पुलाखालच्या उघड्या खाडीत घातली. या विचित्र आणि धक्कादायक प्रकारामुळे संपूर्ण परिसरात एकच खळबळ उडाली आहे. गुगल मॅपच्या आधारे उलवेला जाणारी भरधाव कार थेट खाडीत कोसळल्याची घटना मध्यरात्रीच्या सुमारास बेलापूरमध्ये घडली. घटनेवेळी तिथे उपस्थित असलेल्या सागरी सुरक्षा पोलिसांनी वेळीच महिलेचे प्राण वाचवले. शिवाय क्रेनच्या साहाय्याने खाडीत पडलेली कार देखील बाहेर काढण्यात आली. खाडीतून कार बाहेर काढत असतानाचा व्हिडीओ सोशल मिडीयावरती मोठ्या प्रमाणावरती व्हायरल होताना दिसत आहे.
नेमकं काय घडलं?
मिळालेल्या माहितीनुसार, गुगल मॅप आधारे प्रवास करणाऱ्या वाहनांचे अनेकदा अपघात होत असल्याच्या घटना आपल्या कानावर येतात, पण अशीच एक घटना नवी मुंबईत देखील शुक्रवारी मध्यरात्री (शुक्रवारी पहाटे १ वाजता) घडली आहे. एक महिला तिच्या कारमधून प्रवास करत उलवेच्या दिशेने चालली होती. मात्र बेलापूर येथील खाडीपुलावर जाण्याच्या ऐवजी त्यांनी पुलाखालील मार्ग घेतला. यामुळे गुगल मॅपवर दिसत असल्याप्रमाणे तिथे सरळ रस्ता असल्याचे त्या महिलेला वाटले. यामुळे सरळ जात असताना महिलेची कार थेट ध्रुवतारा जेट्टीवर जाऊन खाडीत कोसळली. जेट्टीला सुरक्षा कठडा नसल्याने कार त्याठिकाणी न अडता थेट खाडीत जाऊन कोसळली.
गुगल मॅपच्या आधारे जाताना पुलाखालचा रस्ता घेतला; गाडी पडली थेट खोलवर खाडीत, मध्यरात्रीच्या वेळी घडली घटना, महिला वाहत जाताना पोलिसांनी वाचवलं, कार खाडीतून बाहेर काढतानाचा व्हिडीओ समोर#MUmbainews #Videoviral #Police pic.twitter.com/FyDBoYCn21
— Ankita Shantinath Khane (@KhaneAnkita) July 26, 2025
सागरी पोलिसांनी घटनास्थळी धाव घेऊन पाहणी केली असता, कारमधील महिला वाहत जात असल्याचे त्यांना दिसून आले. ही घटना घडली त्या परिसराच्या जवळच असलेल्या सागरी सुरक्षा पोलिसांच्या निदर्शनात ही बाब आली. त्या महिलेचा गस्ती व रेस्क्यू बोटीच्या साहाय्याने बाहेर काढून त्यांचा प्राण वाचवण्यात आला. तर खाडीत पडलेली कार क्रेनच्या साहाय्याने बाहेर काढण्यात आली. गुगल मॅपवर रस्ता पाहत जात असताना रस्ता संपून पुढे जेट्टी असल्याचे न कळल्याने हा अपघात घडल्याचे महिलेने पोलिसांना सांगितले. दरम्यान, सागरी सुरक्षा पोलिस चौकीच्या समोरच ही दुर्घटना घडल्याने वेळीच महिलेला मदत मिळाली आणि महिलेचे प्राण वाचले. दरम्यान, या अपघातानंतर ‘गुगल मॅपवर इतकं अवलंबून राहणं किती धोकादायक ठरू शकतं’ याची पुन्हा एकदा चांगलीच जाणीव झाली.