क्वालालंपूर : भारत आणि अमेरिकेने संरक्षण क्षेत्रात पुढील दहा वर्षांसाठी सहकार्य वाढविण्यासाठी एक महत्त्वपूर्ण करार केला आहे. हा करार मलेशियाची राजधानी क्वालालंपूर येथे संरक्षणमंत्री राजनाथ सिंह आणि अमेरिकेचे संरक्षणमंत्री पीट हेगसेथ यांच्या दरम्यान झालेल्या बैठकीत स्वाक्षरीत झाला. या करारानंतर हेगसेथ म्हणाले की, “हा दहा वर्षांचा अमेरिका-भारत संरक्षण आराखडा आमच्या भागीदारीला अधिक बळ देईल आणि प्रादेशिक स्थैर्य व प्रतिकारशक्तीचा पाया ठरेल. आम्ही समन्वय, माहितीची देवाणघेवाण आणि तंत्रज्ञान क्षेत्रातील सहकार्य अधिक मजबूत करत आहोत. आमचे संरक्षणसंबंध पूर्वीपेक्षा अधिक मजबूत झाले आहेत.”
राजनाथ सिंह यांनी यावेळी सांगितले, “क्वालालंपूरमध्ये अमेरिकेचे समकक्ष पीट हेगसेथ यांच्यासोबत अत्यंत फलदायी चर्चा झाली. आम्ही 'अमेरिका-भारत प्रमुख संरक्षण भागीदारी आराखडा' या दहा वर्षांच्या करारावर स्वाक्षरी केली आहे. हा करार दोन्ही देशांमधील आधीच मजबूत असलेल्या संरक्षण भागीदारीला नवे युग देईल. हा आराखडा भारत-अमेरिका संरक्षणसंबंधांना धोरणात्मक दिशा देईल आणि आमच्या वाढत्या रणनीतिक सहकार्याचे प्रतीक ठरेल.
या नव्या दशकात संरक्षण हे दोन्ही देशांच्या द्विपक्षीय संबंधांचे प्रमुख स्तंभ राहील. स्वतंत्र, खुला आणि नियमाधारित हिंद-प्रशांत क्षेत्र निर्माण करण्यासाठी ही भागीदारी निर्णायक ठरेल.” गेल्या काही महिन्यांपासून भारत-अमेरिका संबंधांत काही तणाव दिसून आला होता - टॅरिफ वाद आणि रशियाकडून तेल खरेदी यावरून दोन्ही देशांमध्ये मतभेद झाले होते. मात्र, या नव्या संरक्षण करारामुळे दोन्ही देश पुन्हा जवळ येत असल्याचे आणि परस्पर विश्वास दृढ होत असल्याचे
स्पष्ट दिसते.