नवी दिल्ली : लाल किल्ला बॉम्बस्फोट प्रकरणाबाबत एक नवीन खुलासा झाला आहे. फरीदाबादच्या अल फलाह विद्यापीठातून अटक करण्यात आलेला दहशतवादी डॉ. मुझम्मिलला परदेशातून बॉम्ब बनवण्याचे व्हिडिओ मिळाले होते. एका परदेशी हँडलरने एन्क्रिप्टेड अॅपद्वारे दहशतवादी डॉ. मुझम्मिल अहमद गनईला ४२ बॉम्ब बनवण्याचे व्हिडिओ पाठवले होते.
दिल्ली बॉम्बस्फोटात तीन परदेशी हँडलर्सची नावे समोर आल्याचे तपास यंत्रणेच्या सूत्रांचे म्हणणे आहे. या तीन हँडलर्सची नाव 'हंजुल्लाह','निसार' आणि 'उकासा' अशी झाली आहे. मात्र सुत्रांचे म्हणणे आहे की, ही परदेशी हँडलर्सची खरी ओळख नसून कोड नावे किंवा टोपणनाव असू शकतात. यातील हंजुल्लाहने बॉम्ब बनवण्याचे व्हिडिओ दहशतवादी डॉ. मुझम्मिलला पाठवले होते. मिळालेल्या माहितीनुसार, फरीदाबाद दहशतवादी मॉड्यूलमध्ये अटक केलेला मुझम्मिल हा एकमेव डॉक्टर आहे ज्याला एका परदेशी हँडलरकडून तब्बल ४२ व्हिडिओ मिळाले होते. या व्हिडीओमध्ये बॉम्ब कसा बनवायचा याचे प्रशिक्षण दिले आहे. याबाबत सुरक्षा यंत्रणा आता हँडलरचा अधिक तपास करत असून डॉ. मुझम्मिल सध्या एनआयएच्या ताब्यात आहे.
अलिकडेच, सूत्रांनी सांगितले की अल-फलाह विद्यापीठाची इमारत क्रमांक १७ हे दहशतवाद्यांच्या भेटीचे स्थळ होते. बॉम्बस्फोटाबद्दल कट रचण्याचे काम याच इमारतीमधील खोल्यांमध्ये करण्यात आला होता. तर याच इमारतीमधील खोली क्रमांक १३ मध्ये डॉ. मुझम्मिल राहत होता. त्याच्या खोलीत इतर दहशतवादी डॉक्टरांसोबत गुप्त बैठका होत होत्या. तर याच इमारतीमधील खोली क्रमांक ४ मध्ये डॉ. उमर आणि त्याचे सहकारी भेटत होते. महत्त्वाचे म्हणजे विद्यापीठाच्या प्रयोगशाळेत बनवलेली रसायने मुझम्मिलच्या खोलीत हलवण्याचा निर्णय या बैठकांमध्ये घेण्यात आला होता. यासाठी मुझम्मिलने प्रयोगशाळेपासून काही मिनिटांच्या अंतरावर लपण्याचे ठिकाण ठरवले होते. याच ठिकाणी पोलिसांकडून स्फोटके आणि शस्त्रे जप्त करण्यात आली होती.