रांची : भारतीय संघाचा स्टार फलंदाज रोहित शर्मा वनडे क्रिकेटमध्ये नवा इतिहास रचत ‘सिक्सर किंग’ बनला आहे. दक्षिण आफ्रिकेविरुद्ध रांची येथे झालेल्या पहिल्या सामन्यात त्याने पाकिस्तानचा माजी कर्णधार शाहिद आफ्रिदीचा जुना विक्रम मागे टाकत वनडे इतिहासातील सर्वाधिक षटकार मारणारा फलंदाज म्हणून नवी नोंद केली.
रोहितच्या नावावर आता एकूण ३५२ षटकारांची नोंद झाली आहे. त्याने २७७ सामन्यांतील २६९ डावांमध्ये ही कामगिरी केली. आफ्रिदीनं ३९८सामन्यांच्या ३६९ डावांमध्ये ३५१ षटकार ठोकले होते. अनेक वर्षांपासून त्याचा हा विक्रम अबाधित होता, मात्र रांचीत रोहितनं तो मोडीत काढला.
वनडे क्रिकेटमधील सर्वाधिक षटकार मारणारे फलंदाज:
३५२ - रोहित शर्मा, भारत
३५१ - शाहिद आफ्रिदी, पाकिस्तान
३३१ - ख्रिस गेल, वेस्ट इंडिज
२७० - सनथ जयसूर्या, श्रीलंका
२२९ - एमएस धोनी, भारत
रोहितनं आणखी एक विशेष नोंद आपल्या नावावर केली आहे. तो एकाच संघासाठी ३५० पेक्षा जास्त षटकार मारणारा जगातील पहिला फलंदाज ठरला आहे. रोहितनं टीम इंडियासाठी सर्व ३५२ षटकार नोंदवले. दुसरीकडे, आफ्रिदीनं पाकिस्तानसाठी ३४९ तर आयसीसीच्या टीमसाठी २ षटकार मारले होते.
रांचीच्या सामन्यात विराट कोहली आणि रोहित शर्मा यांनी दमदार फलंदाजी करत भारतीय डावाला मजबूत सुरुवात करून दिली. यशस्वी जैस्वाल लवकर बाद झाल्यानंतर रोहित आणि विराटनं १०० भागीदारी रचली. विराटनं ४८ चेंडूत षटकार ठोकत आपलं अर्धशतक पूर्ण केलं. त्यानंतर रोहितनं ४३ चेंडूत अर्धशतक गाठलं, जे त्याच्या वनडे कारकिर्दीतील साठवं अर्धशतक ठरलं. रोहितनं ५१ चेंडूंमध्ये ५७ धावा केल्यानंतर मार्को जानसेनच्या गोलंदाजीवर तो पायचीत झाला.