नवी मुंबई : अयोध्येतील राम मंदिराचे काम पूर्ण झाले आहे. नोव्हेंबर महिन्यात पंतप्रधान नरेंद्र मोदी यांच्या हस्ते राम मंदिरावर ध्वजारोहण करण्यात आले. यानंतर आता अयोध्येतील राम मंदिर परिसरात बांधण्यात आलेल्या मंदिरांमध्ये सेवा देण्यासाठी ७० नवे पुजारी घेतले जाणार आहेत. श्रीराम जन्मभूमी तीर्थक्षेत्र ट्रस्टने हा निर्णय घेतला आहे. १३ डिसेंबर रोजी श्री रामजन्मभूमी तीर्थक्षेत्राच्या कार्यकारिणी बैठकीत मणिराम छावनी पीठाधीश्वर महंत नृत्यगोपाल दास यांच्या अध्यक्षतेखाली ही मान्यता देण्यात आली. राम मंदिराचे मुख्य पुजारी आचार्य सत्येंद्र नाथ शास्त्री यांच्या निधनानंतर चार वरिष्ठ पुजारी आधीच त्यांचे सहाय्यक म्हणून काम करत होते. ट्रस्टने नवीन पुजारींसाठी पुजारी प्रशिक्षण योजनेअंतर्गत २४ पुजाऱ्यांना प्रशिक्षण आणि नियुक्ती केली होती, परंतु त्यांना नियुक्ती पत्रे देण्यात आली नव्हती. पगार आणि इतर सुविधांबाबतची मागणी तीव्र झाली, तेव्हा सर्व नवीन पुजाऱ्यांना प्रशिक्षण प्रमाणपत्र आणि निर्धारित मानधन देऊन त्यांची मुक्तता करण्यात आली. यामुळे पुजाऱ्यांमध्ये नाराजी पसरल्याचे म्हटले जात आहे. काही महिन्यांनंतर २० प्रशिक्षित पुजाऱ्यांपैकी दहा पुजाऱ्यांना नवीन सशर्त नियुक्ती देण्यात आली. त्यानंतर आणखीन सहा अतिरिक्त प्रशिक्षणार्थींना नियुक्ती पत्रे देण्यात आली, तर चार प्रशिक्षणार्थींना नियुक्ती देण्यात आली नाही. त्यांना सेवामुक्त करण्यात आले.
राम मंदिर आणि राम दरबारात २० पुजारी सेवेत
ट्रस्टने नियुक्त केलेले २० पुजारी राम मंदिर आणि राम दरबार तसेच परिसरातील सहा मंदिरांमध्ये सेवा देत आहेत. यात शेषावतार मंदिर आणि यज्ञ मंडपम, सप्त मंडपम आणि कुबेर टीला येथील कुबेरेश्वर महादेव मंदिर यांचा समावेश आहे. सुरुवातीला १४ पुजाऱ्यांना सकाळ आणि सायंकाळ अशा शिफ्टमध्ये नियुक्त केले गेले होते. उर्वरित २० पुजाऱ्यांसाठीही अशीच व्यवस्था करण्यात आली आहे. फरक असा आहे की, पहिली टीम एके दिवशी राम मंदिरात सकाळी आणि सायंकाळी शिफ्टमध्ये काम करेल, तर दुसरी टीम राम दरबारात सकाळी आणि सायंकाळी शिफ्टमध्ये काम करेल. दुसऱ्या दिवशी, त्यांच्या कर्तव्यांची यादीनुसार अदलाबदल केली जाईल. राम मंदिरात सेवा देणारी टीम दुसऱ्या दिवशी राम दरबारात पूजा करेल, तर राम दरबारची टीम राम मंदिरात सेवा देईल.
अमावस्येला सेवेत बदल करण्यात येतो
राम मंदिर परिसरातील सर्व मंदिरांमध्ये नियमित पूजा सुरळीत सुरू ठेवण्यासाठी ट्रस्टने सकाळ आणि सायंकाळच्या सेवेत बदल करण्याचे जुने सूत्र स्वीकारले आहे. पूर्वी इंग्रजी कॅलेंडरनुसार, महिन्यातून प्रत्येकी १५ दिवस म्हणजे १-१५ आणि १६-३० दिवसांसाठी सेवा निश्चित केली होती. आता हिंदी पंचांगानुसार, अमावस्या आणि पौर्णिमेला सेवेत बदल होतो. उदाहरणार्थ, १० पुजारींपैकी प्रत्येकी पाच पुजारी सकाळ आणि सायंकाळी शिफ्टमध्ये सेवा देतात. पंधरा दिवसांनंतर, सकाळी सेवेत असलेले पुजारी सायंकाळच्या शिफ्टमध्ये येतात, तर सायंकाळी शिफ्टमध्ये करणारे पुजारी सकाळी सेवा देतात. दरम्यान, राम मंदिर, राम दरबार, शेषावतार आणि परिसरातील सहा मंदिरांसह मंदिरांमध्ये नियमित सेवा करण्यासाठी, सकाळी आणि सायंकाळी अशा तीन शिफ्टमध्ये ८ तास किंवा त्याहून अधिक काम करणाऱ्या ४२ पुजाऱ्यांची आवश्यकता आहे.