नवी दिल्ली : भारत जगातील चौथी सर्वात मोठी अर्थव्यवस्था असलेला देश झाल्याची माहिती केंद्र सरकारने दिली आहे. भारताने जपानला मागे टाकले आहे. अमेरिका ही जगातील सर्वात मोठी अर्थव्यवस्था असून त्यानंतर दुसऱ्या क्रमांकावर चीन व तिसऱ्या क्रमांकावर जर्मनी हे देश आहेत. पुढील अडीच ते तीन वर्षांत भारतीय अर्थव्यवस्था जर्मनीला मागे टाकेल, असे सरकारकडून सांगण्यात आले आहे. २०३० पर्यंत भारताचा जीडीपी म्हणजेच सकल देशांतर्गत उत्पादन (GDP – Gross Domestic Product) ७.३ ट्रिलियन डॉलरपर्यंत पोहोचेल, त्यामुळे भारत जर्मनीला मागे टाकून जगातील तिसऱ्या क्रमांकाची अर्थव्यवस्था होईल, असा अंदाज नुकतेच व्यक्त करण्यात आला आहे.
आर्थिक वर्ष २०२५-२०२६ च्या दुसऱ्या तिमाहीत भारताचा जीडीपी ८.२ टक्क्यांनी वाढला आहे. पहिल्या तिमाहीत जीडीपी ७.८ टक्के होता. तर मागील आर्थिक वर्षाच्या शेवटच्या तिमाहीत जीडीपी ७.४ टक्के होता. सरकारने जारी केलेल्या परिपत्रकात म्हटले आहे की, “भारताची अर्थव्यवस्था ४.१८ ट्रिलियन डॉलरसह जपानला मागे टाकत जगातील चौथी सर्वात मोठी अर्थव्यवस्था झाली आहे.
पुढील अडीच ते तीन वर्षात भारताची अर्थव्यवस्था ७.३ ट्रिलियन डॉलर होऊन २०३० पर्यंत जर्मनीला मागे टाकेल.” तसेच भारताची अर्थव्यवस्था ही जगात सर्वाधिक वेगाने वाढत असल्याचे परिपत्रकात म्हटले आहे.
अमेरिका ही जगातील सर्वात मोठी अर्थव्यवस्था असून त्यानंतर चीन व जर्मनीचा क्रमांक लागतो. जागतिक अस्थिरता, युद्ध, व्यापार करारातील अडथळे व अमेरिकेकडून लावले जाणारे आयात शुल्क या पार्श्वभूमीवर भारत जगातील चौथ्या क्रमांकाची अर्थव्यवस्था असलेला देश झाला आहे. जीडीपीमध्ये वाढ होण्यात देशांतर्गत खरेदीत झालेल्या वाढीचे योगदान आहे. तसेच देशात बेरोजगारी कमी होत आहे, देशातून होणारी निर्यात सातत्याने वाढत आहे.