पंतप्रधान नरेंद्र मोदी यांच्या प्रस्तावित इस्रायल दौऱ्यापूर्वी इस्रायलचे पंतप्रधान बेंजामिन नेतन्याहू यांनी भारताचे कौतुक केले असून भारत–इस्रायल संबंधांना भक्कम भागीदारी असे संबोधले आहे.
जेरुसलेममध्ये मेजर अमेरिकन ज्यूइश ऑर्गनायझेशन्सच्या परिषदेला संबोधित करताना नेतन्याहू यांनी सांगितले की पुढील आठवड्यात भारताचे पंतप्रधान इस्रायलला भेट देणार असून दोन्ही देश सर्व प्रकारच्या सहकार्याबाबत चर्चा करतील. यावेळी नेत्याहू यांनी भारत–इस्रायल संबंधांना भक्कम भागीदारी असे संबोधले.
मोदींचा दुसरा इस्रायल दौरा:
पंतप्रधान मोदी यांचा इस्रायल दौऱ्याची अधिकृत तारीख जाहीर झालेली नसली तरी नवी दिल्लीतील एआय समिटनंतर ते २७-२८ फेब्रुवारीला इस्रायलला जाऊ शकतात. त्यांचा हा दौरा धोरणात्मक, संरक्षण, सायबर सुरक्षा आणि तंत्रज्ञान क्षेत्रांतील सहकार्याला नवी दिशा देऊ शकतो. मोदी यांच्या तिसऱ्या कार्यकाळातील हा पहिलाच इस्रायल दौरा असेल. यापूर्वी त्यांनी २०१७ मध्ये इस्रायलला भेट दिली होती. त्या ऐतिहासिक दौऱ्यात दोन्ही देशांमधील राजनैतिक संबंधांना २५ वर्षे पूर्ण झाल्याच्या पार्श्वभूमीवर संरक्षण सहकार्य, शेती, जलव्यवस्थापन, सायबर सुरक्षा आणि दहशतवादविरोधी भागीदारी यांवर महत्त्वपूर्ण चर्चा झाली होती.
पश्चिम आशियातील सुरक्षा परिस्थितीवर चर्चा:
आगामी भेटीत दोन्ही नेते द्विपक्षीय सहकार्याबरोबरच पश्चिम आशियातील सध्याची सुरक्षा परिस्थिती आणि जागतिक मुद्द्यांवरही विचारविनिमय करू शकतात. वर्षाच्या सुरुवातीलाही दोन्ही नेत्यांमध्ये संवाद झाला होता, ज्यात गाझाशी संबंधित शांतता प्रयत्न आणि प्रादेशिक स्थैर्याबाबत चर्चा झाली. त्या वेळी पंतप्रधान मोदी यांनी न्याय्य आणि टिकाऊ शांततेसाठी भारताच्या पाठिंब्याचा पुनरुच्चार केला होता.
भारत–इस्रायल संबंधांना नवी ऊर्जा मिळणार:
मोदी आणि नेतन्याहू यांच्यात वैयक्तिक पातळीवरही चांगले संबंध असल्याचे मानले जाते. गेल्या काही वर्षांत दोन्ही नेत्यांनी अनेक मंचांवर एकमेकांशी मैत्री दाखवली आहे. हा संभाव्य दौरा भारत–इस्रायल संबंधांना नवी ऊर्जा देणारा ठरू शकतो. संरक्षण, तंत्रज्ञान, नवोन्मेष आणि प्रादेशिक सुरक्षा यांसारख्या महत्त्वाच्या क्षेत्रांत सहकार्य अधिक बळकट होण्याची अपेक्षा आहे.