मुंबई: मुंबई महापालिकेचे कामकाज हे शंभर टक्के मराठीतून असतानाही आजही कामगारां विषयांच्या तसेच इतर बाबींची परिपत्रके ही इंग्रजी भाषेतून काढली जात आहे. त्यामुळे २७ फेब्रुवारी या मराठी भाषा दिनाचे औचित्य साधून महापौरांनी मुंबई महापालिकेच्यावतीने काढली जाणारी सर्व प्रकारची परिपत्रके ही मराठी भाषेतूनच काढली जावीत अशाप्रकारचे निर्देश देण्याची मागणी महापालिका सभागृहात भाजपचे स्वीकृत नगरसेवक प्रविण छेडा यांनी केली.
मुंबई महापालिकेच्या सभेपुढे महापालिका अतिरिक्त आयुक्त डॉ अश्विनी जोशी यांनी प्रशसनाच्यावतीने अधिकाऱ्यांच्या पदोन्नतीच्या प्रस्तावाला अग्रक्रम देण्याचा प्रस्ताव मांडला. या प्रस्तावाला महापौरांनी परवानगी दिल्यानंतर या प्रस्तावावर विरोधी पक्षनेत्या किशोरी पेडणेकर यांनी अभियंत्याच्या बढतीचे प्रस्ताव स्थापत्य शहर समितीपुढे मांडले जात असताना इथे का मांडले आणि २१ अधिकाऱ्यांच्या जागा रिक्त् असताना सहा अधिकाऱ्यांच्या बढतीचे प्रस्ताव का आणले असा सवाल केला. यावर स्थायी समिती अध्यक्ष प्रभाकर शिंदे यांनी २१ जणांच्या नावाचे प्रस्ताव येणे गरजेचे असताना सहा जणांच्या बढतीचे प्रस्ताव आले, मग उर्वरीतांच्या बढतीचे प्रस्ताव का आले नाही याबाबत शंका उपस्थित करत मग इतर अधिकाऱ्यांवर हा अन्याय नाही का असा सवाल त्यांनी केला.
तर भाजपचे स्वीकृत नगरसेवक प्रविण छेडा यांनी हा प्रस्ताव म्हणजे सलिम जावेदची पटकथा असल्याचे सांगत साडेचार वर्षांत किती अधिकाऱ्यांना बढती दिली गेली याची माहिती दिली जावीत,तसेच न्यायप्रविष्ठ प्रकरणे किती आहेत याचीही दिली जावी अशी मागणी केली.तसेच या अधिकाऱ्यांच्या बढतीसह कामगारांसंदर्भात परिपत्रकेही इंग्रजी भाषेत काढली जात असल्याने छेडा यांनी खंत व्यक्त केला. त्यामुळे महापौरांनी आजच प्रशासनाला निर्देश देत यापुढे सर्व प्रकारचे परिपत्रके ही मराठी भाषेतूनच काढली जावीत,असे सांगावे आणि मराठी भाषा दिनाचे औचित साधून हे निर्देश तात्काळ देवून यापुढे शुध्द मराठीतून परिपत्रक काढली जातात का हेही पाहावे अशा प्रकारच्या सूचना केल्या. यावर सभागृहात सर्वच नगरसेवकांनी टाळ्या वाजवून या सूचनेचे कौतूक केले.