माणगाव : माणगाव तालुक्यातील नागरिक, शेतकरी, विद्यार्थी आणि महिलांना विविध प्रकारचे शासकीय दाखले व महसूल विषयक सेवा तातडीने उपलब्ध करून देण्यासाठी “छत्रपती शिवाजी महाराज महसूल शिबीर अभियान” ७ मार्चपासून सुरू होत आहे. या अभियानाच्या माध्यमातून महसूल विभागाच्या विविध सेवांचा लाभ थेट नागरिकांपर्यंत पोहोचविण्याचा प्रयत्न करण्यात येणार असून, सर्व स्तरावरील नागरिकांनी या उपक्रमाचा जास्तीत जास्त लाभ घ्यावा, असे आवाहन उपविभागीय अधिकारी तथा प्रांताधिकारी डॉ. संदीपान सानप यांनी पत्रकार परिषदेत केले.
या विशेष अभियानांतर्गत तालुक्यातील विविध भागांमध्ये महसूल शिबिरे आयोजित करण्यात आली असून नागरिकांना त्यांच्या गावाजवळच सेवा मिळणार आहेत. त्यामुळे कार्यालयीन फेऱ्या टाळून नागरिकांचे वेळ व खर्च दोन्ही वाचणार आहेत. या अभियानाचे वेळापत्रक पुढीलप्रमाणे आहे. ७ मार्च – निकम स्कूल, लोणेरे १४ मार्च – ग्रामपंचायत तळाशेत - इंदापूर आणि ग्रामपंचायत निजामपूर १० एप्रिल – मराठी शाळा, विळे, १७ एप्रिल – बुद्ध विहार, गोरेगाव,८ मे – तलाठी भवन, माणगाव, १५ मे – ग्रामपंचायत मोरबा, ही सर्व शिबिरे सकाळी १० ते सायंकाळी ५ या वेळेत आयोजित करण्यात येणार आहेत.
या शिबिरांमध्ये ग्रामीण भागातील नागरिकांच्या महसूल विभागाशी संबंधित दैनंदिन जीवनातील विविध समस्या आणि तक्रारी तातडीने निकाली काढण्यावर भर दिला जाणार आहे. विशेषतः उत्पन्न दाखला, जात दाखला, रहिवासी दाखला, वारस प्रमाणपत्र, ७/१२ उतारे, फेरफार नोंदी तसेच इतर महसूल विषयक कागदपत्रे तातडीने देण्यासाठी आवश्यक ती प्रक्रिया शिबिरातच पूर्ण केली जाणार आहे. त्यामुळे विद्यार्थ्यांना शैक्षणिक प्रवेशासाठी तसेच नागरिकांना विविध शासकीय योजनांचा लाभ घेण्यासाठी मोठी मदत होणार आहे.