बुबियान बेट : इराणने कुवेतच्या बुबियान बेटावरील अमेरिकेच्या नौसैनिकांवर हल्ला केला. यात मोठ्या प्रमाणात जीवितहानी झाल्याचे वृत्त आहे. अधिकृत आकडेवारी अद्याप जाहीर झालेली नाही.
इराणचे लष्करी प्रवक्ते इब्राहिम झोल्फघारी यांनी व्हिडीओ निवेदन प्रसिद्ध केले आहे. अमेरिकेच्या जवानांना लक्ष्य करून ड्रोन आणि क्षेपणास्त्रांद्वारे हल्ला केल्याचे त्यांनी सांगितले. अमेरिका मागे हटणार नसेल तर अमेरिकेच्या सैनिकांवर आणखी संहारक हल्ले होतील, असेही त्यांनी सांगितले.
याआधी शनिवारी पहाटे झालेल्या इराणच्या एका वेगळ्या बॅलिस्टिक क्षेपणास्त्र हल्ल्यात अमेरिकेचे अनेक सैनिक जखमी झाले, असे वृत्त वॉल स्ट्रीट जर्नलने दिले आहे. अमेरिका आणि सौदी अरेबियाच्या अधिकाऱ्यांशी बोलल्यानंतर हे वृत्त दिल्याचेही त्या बातमीत नमूद आहे. पेंटागॉनने अद्याप दोन्ही हल्ल्यांवर कोणतीही प्रतिक्रिया दिलेली नाही.
एकीकडे इराण अमेरिकेच्या सैनिकांना लक्ष्य करण्यासाठी हल्ले करत असताना दुसरीकडे येमेनी शिया हौती बंडखोरांनी इस्रायलच्या डिमोना आण्विक प्रकल्पावर क्षेपणास्त्र हल्ला करून थेट युद्धात प्रवेश केला. यामुळे रेड सी अर्थात लाल समुद्रातून बाब अल-मंदाब सामुद्रधुनीमार्गे (Bab al-Mandab Strait) होणारा तेलाचा पुरवठा बंद पडण्याचा धोका वाढला आहे. होर्मुझ सामुद्रधुनी (Strait of Hormuz) आणि बाब अल-मंदाब सामुद्रधुनी या दोन्ही ठिकाणी तेल वाहतुकीवर बंधनं आणली गेल्यास आंतरराष्ट्रीय पातळीवर मोठे ऊर्जा संकट निर्माण होण्याचा धोका आहे.