मध्यपूर्वेतील तणावाच्या पार्श्वभूमीवर जवळपास ४८ दिवस इंटरनेट निर्बंध सहन केलेल्या इराण मधील नागरिकांना अखेर अंशतः दिलासा मिळाला आहे. गुगल सर्च (Google Search) सेवा पुन्हा सुरू झाली असून लँडलाईन आणि मोबाईल इंटरनेटद्वारे ती वापरणे शक्य झाले आहे. मात्र, इंटरनेट कनेक्टिव्हिटी अजूनही विस्कळीतच आहे.
स्थानिक माध्यमांच्या माहितीनुसार, Gmail सह इतर महत्त्वाच्या सेवा अजूनही बंद आहेत. यावरून इंटरनेट सेवा पूर्णपणे सुरळीत सुरु झाली नसल्याचे स्पष्ट होते.
या दीर्घकालीन निर्बंधांचा अर्थव्यवस्थेवर मोठा परिणाम झाला आहे. अहवालानुसार, सुमारे १.८ अब्ज डॉलर्सचे नुकसान झाले असून ई-कॉमर्स, डिजिटल सेवा आणि लहान उद्योगांना मोठा फटका बसला आहे.
सरकारकडून टप्प्याटप्प्याने सेवा पूर्ववत केल्या जात असल्या तरी सर्व सेवा पूर्णपणे सुरू होण्यासाठी अजून काही काळ लागू शकतो.