नवी दिल्ली : मागील काही महिन्यांपासून अमेरिकेने रशियन तेल खरेदीवर भारतावर निर्बंध लादले होते भारतावरील हे निर्बंध इराणने स्ट्रेट ऑफ होर्मुझ बंद केल्यानंतर कमी एक महिन्यासाठी कमी केले होते. आता पुन्हा एकदा हे निर्बंध लादण्यात आले आहेत. यामुळे रशियन तेल खरेदीसाठी मिळालेली ३० दिवसांची सूट संपुष्टात आली आहे. भारत रशियाकडून कच्चे तेल आणि एलपीजीची खरेदी सुरूच ठेवणार आहे. भारताचे ऊर्जा आयात धोरण हा पूर्णपणे भारताचा स्वतःचा निर्णय आहे आणि ते अमेरिकेच्या निर्बंधांवर अवलंबून नाहीत, असे भारत सरकारने ठणकावून सांगितले आहे.
अमेरिकेने सूट वाढवली नसली तरी, भारतीय रिफायनरी निर्बंधांच्या अधीन नसलेल्या कंपन्या आणि जहाजांकडून तेल खरेदी करणे सुरू ठेवतील. सूट देणे किंवा न देणे हा अमेरिकेचा विशेषाधिकार आहे, परंतु त्यामुळे ते भारताचे धोरण ठरत नाही. ‘रशियाकडून अधिक एलपीजी खरेदी करण्याचे प्रयत्न सुरू आहेत. कच्चे तेल आणि एलपीजी दोन्ही निर्बंधमुक्त स्रोतांकडून येत राहतील,’ असे एका अधिकाऱ्याने सांगितले.
अमेरिकेच्या ट्रेझरी विभागाने आर्थिक निर्बंध वाढवण्याची तयारी करत असल्याचे आणि इराणला पाठिंबा देणाऱ्या देशांवर अतिरिक्त निर्बंध लादण्याचा विचार करत असल्याचे संकेत दिले आहेत. मार्च २०२६ मध्ये भारताने रशियाकडून दररोज सरासरी १९.८ ते २०.६ लाख बॅरल तेल आयात केले.मार्च २०२६ मध्ये, चीननंतर भारत रशियन ऊर्जेचा दुसरा सर्वात मोठा खरेदीदार होता, त्यांनी अंदाजे ५.८ अब्ज युरोची आयात केली. पश्चिम आशियातील सध्याच्या तणावाच्या पार्श्वभूमीवर, भारत प्रत्येक संभाव्य स्रोताकडून ऊर्जा खरेदी करण्याचे धोरण अवलंबत आहे. युक्रेन युद्धानंतर भारत रशियाचा सर्वात मोठा सागरी खरेदीदार बनला होता. आता, इराण युद्ध आणि होर्मुझ सामुद्रधुनी बंद झाल्यानंतर परिस्थिती पुन्हा बदलली असून, भारताने रशियाकडून आपली तेल खरेदी वाढवली आहे.