बेंगळुरू शहरातील नंदिनी लेआउट परिसरातून एक धक्कादायक घटना समोर आली आहे. रविवारी उशिरा रात्री लागलेल्या भीषण आगीत ५० तरुणींचा जीव थोडक्यात वाचला. या घटनेचा थरारक व्हिडिओ सध्या सोशल मीडियावर मोठ्या प्रमाणात व्हायरल होत आहे.
मिळालेल्या माहितीनुसार, एका LED बॅनरच्या गोदामाला अचानक आग लागली. ही आग काही क्षणांतच भीषण स्वरूप धारण करत शेजारील चार मजली लेडीज PG इमारतीपर्यंत पोहोचली. आगीच्या प्रचंड ज्वाळा आणि धुरामुळे परिसरात भीतीचे वातावरण निर्माण झाले.
घटनेची माहिती मिळताच अग्निशमन दल आणि पोलिसांनी तात्काळ घटनास्थळी धाव घेतली. बचावकार्य वेगाने राबवून सर्व तरुणींना सुरक्षित बाहेर काढण्यात आले. सुदैवाने या भीषण आगीत कोणतीही जीवितहानी झाली नाही, मात्र काही जण किरकोळ जखमी झाल्याची माहिती आहे.
या घटनेने पुन्हा एकदा शहरातील PG आणि व्यावसायिक इमारतींमधील सुरक्षा व्यवस्थेचा मुद्दा ऐरणीवर आणला आहे.