शिलॉन्ग Shillong : राजा रघुवंशी हत्या प्रकरणाने संपूर्ण देशभरात खळबळ उडवून दिली होती. याच राजा रघुवंशी हत्या प्रकरणात मुख्य आरोपी आणि मृताची पत्नी सोनम रघुवंशीला तब्बल ११ महिन्यांनंतर जामीन मंजूर करण्यात आला आहे. या निर्णयामुळे मेघालय पोलिसांच्या तपासावर प्रश्नचिन्ह उपस्थित झाले असून, एका गंभीर चुकामुळे संपूर्ण प्रकरण कमकुवत झाल्याची बाब समोर आली आहे. सोनमच्या चौथ्या सुनावणीत न्यायालयाने भूमिका बदलत अटकेच्या कागदपत्रांतील त्रुटी लक्षात घेत सोनमला जामीन मंजूर केलाय. न्यायालयाने तिला पुरावे व साक्षीदारांपासून दूर राहण्याचे तसेच शिलॉन्ग सोडू नये, अशी अट घातली आहे. (Raja Raghuvanshi Case )
अटक मेमोमध्ये चुकीचे कलम
एवढ्या मोठ्या प्रकरणात आणि ७९० पानी आरोपपत्र दाखल असतानाही सोनम रघुवंशीला जामीन मंजूर झाल्याने राजा रघुवंशीच्या कुटुंबियांकडून नाराजी व्यक्त करण्यात आली आहे. या प्रकरणात सर्वात मोठी चूक म्हणजे अटक मेमोमध्ये चुकीचे कलम लावण्यात आले. हत्या प्रकरणात बीएनएस कलम 103(1) लावणे अपेक्षित असताना, पोलिसांनी चुकून कलम 403(1) लागू केले, जे संपत्तीचा गैरवापर यासंदर्भात आहे.
या गंभीर त्रुटीमुळे अटकेची कारणे स्पष्ट न दिल्याचे मानले गेले आणि आरोपीच्या मूलभूत अधिकारांचे उल्लंघन झाल्याचे न्यायालयाने नमूद केले. त्यामुळे जामीन मंजूर करण्याचा मार्ग मोकळा झाला. तसेच, २ जून २०२५ रोजी गाझीपूर न्यायालयात सोनमला हजर करताना तिच्याकडे वकील कोण होता, याची माहिती पोलिसांकडे नव्हती. तिला कायदेशीर मदत मिळाल्याचा कोणताही पुरावा नसल्याने न्यायालयाने यालाही अधिकारांचे उल्लंघन मानले. पोलिसांनी ही चूक केवळ लिपिकीय असल्याचे सांगितले, मात्र न्यायालयाने हा युक्तिवाद फेटाळून लावला. (Sonam Raghuvanshi)
दरम्यान, ११ महिने कारावास आणि सुनावणीतील विलंब याचाही फायदा सोनमला झाला. तिच्या वकिलांनी अटक मेमो, इतर कागदपत्रे आणि केस डायरीतही चुकीची कलमे नमूद असल्याचे दाखवून दिले. त्यामुळे जामीन मिळण्यास मदत झाली. या निर्णयानंतर इतर आरोपींनाही दिलासा मिळण्याची शक्यता व्यक्त होत आहे. ५० हजार रुपयांच्या जात मुचलक्यावर तिला जामीन देण्यात आला असून, सोनमचे वडील देवी सिंह यांनी तो भरला. मात्र, जामीन मिळूनही सोनमला शिलॉन्गबाहेर जाण्यास मनाई आहे. इंदौरमध्ये या निर्णयाविरोधात संताप व्यक्त होत असून, मृत राजा रघुवंशीच्या भावाने हा निर्णय उच्च न्यायालयात आव्हान देण्याची भूमिका घेतली आहे. तर त्यांची आई या प्रकरणाच्या सीबीआय चौकशीची मागणी करत आहे.