अकोला : पुण्यात चिरमुरडीवर अत्याचार झाला आणि तिची हत्या झाली या घटनेच्या धक्कातून राज्य सावरत नाही तोच अकोल्यातून धक्कादायक बातमी आली आहे. अकोल्यात ६० वर्षाच्या वृद्धाने स्वतःच्या नातीवर अत्याचार केल्याचे समोर आले आहे.
नेमकं काय घडलं ?
सदर घटना अकोल्याच्या पातूर तालुक्यातील आहे. मिळालेल्या माहितीनुसार पीडित मुलीचे आईवडील मोलमजुरी करून उदरनिर्वाह करत होते. आई वडील कामावर जायचे. मुलगी घरी एकटीच असायची. याच गोष्टीचा गैरफायदा घेत आरोपीने मुलीवर अत्याचार केले. चिमुरडीवर सलग पाच दिवस अत्याचार झाले.
प्रकरण बाहेर कसं आलं ?
वृद्धाने दाखवलेल्या भीतीमुळे मुलीने आई वडिलांना सांगायची हिंमत केली नव्हती. पण सततचे अत्याचार मुलीला सहन नाही झाले, तिने शेवटी आई वडिलांना सर्व सांगितले आणि आई वडिलांच्या पायाखालची जमीनच सरकली. पीडित मुलीला घेऊन आई वडिलांनी तात्काळ पोलीस ठाण्यात धाव घेतली. तक्रार दाखल करण्यात आल्यावर पोलीस पथक तडक आरोपीला अटक करण्यासाठी निघाले. पण आपण अडचणीत येणार याची जाणीव होताच अत्याचार करणारा आरोपी फरार झाला. पोलीस सध्या आरोपीचा शोध घेत आहेत. पोलिसांची तीन पथके आरोपीला शोधत आहेत.
अल्पवयीन मुलींवरील हे अत्याचार कधी थांबणार ? यावर ठोस उपाय होणार का ? असे प्रश्न सर्व स्तरांतून विचारले जात आहेत. अल्पवयीन मुली आता स्वतःच्या घरातही सुरक्षित नाहीत का ? असा प्रश्न निर्माण झाला आहे.