नवी दिल्ली : पंतप्रधान नरेंद्र मोदी दोन दिवसांच्या नॉर्वे दौऱ्यावर जाणार आहे. हा दौरा १८ आणि १९ मे रोजी असेल. देशाच्या परराष्ट्र मंत्रालयाने प्रसिद्धीपत्रक काढून ही माहिती दिली आहे. मोदींचा दौरा हा एक ऐतिहासिक दौरा असेल. कारण १९८३ पासून कोणत्याही भारतीय पंतप्रधानांनी नॉर्वेला भेट दिलेली नाही, असेही परराष्ट्र मंत्रालयाकडून सांगण्यात आले.
ओस्लो येथे पंतप्रधान मोदींच्या दौऱ्यासाठी नियोजन सुरू आहे. लष्करी आणि राजकीयदृष्ट्या हा दौरा भारतासाठी महत्त्वाचा आहे. मोदींच्या दौऱ्यादरम्यान भारत आणि नॉर्वे व्यापार, हवामान, तंत्रज्ञान आणि जागतिक सुरक्षा यांसारख्या विविध विषयांवर चर्चा करतील. नॉर्डिक-भारत शिखर परिषद पण होईल. या परिषदेत डेन्मार्क, फिनलंड, आइसलँड, स्वीडन आणि नॉर्वे या नॉर्डिक देशांचे नेते उपस्थित असतील. हे सर्व नेते पंतप्रधान मोदींशी चर्चा करणार आहेत. ही शिखर परिषद दोन्ही प्रदेशांमधील राजकीय संवाद आणि आर्थिक सहकार्य दृढ करण्याच्या दृष्टीने अतिशय महत्त्वाची आहे. या दौऱ्यादरम्यान, पंतप्रधान मोदी नॉर्वेचे पंतप्रधान जोनास गहर स्टोअर यांच्यासोबत द्विपक्षीय चर्चा करतील. तसेच मोदी नॉर्वे-भारत व्यवसाय आणि संशोधन शिखर परिषदेत भारतीय व नॉर्वेजियन व्यावसायिक प्रतिनिधींना भेटतील.
भारत आणि नॉर्वे यांनी २०२४ मध्ये एका मुक्त व्यापार करारावर सहमती दर्शवली होती, जो गेल्या वर्षी अंमलात आला. या करारामुळे दोन्ही देशांमधील आर्थिक संबंधांसाठी नवीन संधी निर्माण झाल्या आहेत. गेल्या दहा वर्षांत भारत आणि नॉर्वे यांच्यातील व्यापार दुप्पट झाला असून, येत्या काही वर्षांत गुंतवणूक आणि आर्थिक सहकार्य आणखी वाढण्याची शक्यता आहे. मोदींच्या दौऱ्याच्या निमित्ताने भारत आणि नॉर्वे यांच्यातील व्यापार आणि तांत्रिक सहकार्य अधिक दृढ होण्याची शक्यता आहे.
नॉर्डिक-भारतीय शिखर परिषदेत ग्रीन ट्रान्झिशन, डिजिटलायझेशन, इनोव्हेशन आणि व्यापार यांसारख्या विषयांवर चर्चा होणार आहे. परस्पर सहकार्यासाठी राजकीय पातळीवर सविस्तर चर्चा होणार आहे. दोन्ही देशांतील आर्थिक सहकार्य वाढवण्यावर भर दिला जाणार आहे.