मुंबई : देशभरातील लाखो विद्यार्थ्यांसाठी महत्त्वाची बातमी. कॉमन युनिव्हर्सिटी एन्ट्रन्स टेस्ट (CUET-UG 2026) परीक्षेच्या वेळापत्रकात (Exam Timetable) बदल करण्यात आला असून २८ मे २०२६ रोजी होणाऱ्या दोन्ही शिफ्टमधील परीक्षा स्थगित करण्यात आल्या आहेत. बकरी ईद (ईद-उल-अजहा) सुट्टीच्या तारखेत झालेल्या बदलामुळे नॅशनल टेस्टिंग एजन्सी (NTA) ने हा निर्णय घेतला आहे. नव्या परीक्षेच्या तारखा आणि प्रवेशपत्रांबाबतची माहिती लवकरच जाहीर केली जाणार आहे.
केंद्रीय विद्यापीठे आणि इतर उच्च शिक्षण संस्थांमधील पदवी अभ्यासक्रमांच्या प्रवेशासाठी घेण्यात येणारी CUET-UG परीक्षा देशातील सर्वात महत्त्वाच्या प्रवेश परीक्षांपैकी एक मानली जाते. यंदा या परीक्षेला लाखो विद्यार्थी बसत असल्याने वेळापत्रकातील या बदलाकडे सर्वांचे लक्ष लागले आहे. २८ मे रोजीच्या दोन्ही शिफ्टच्या परीक्षा रद्द नाहीत, फक्त पुढे ढकलल्या एनटीएने दिलेल्या माहितीनुसार, २८ मे २०२६ रोजी होणाऱ्या पहिल्या आणि दुसऱ्या शिफ्टमधील परीक्षा सध्या पुढे ढकलण्यात आल्या आहेत. बकरी ईदच्या पार्श्वभूमीवर कायदा-सुव्यवस्था, सार्वजनिक वाहतूक व्यवस्था आणि विद्यार्थ्यांच्या सोयीचा विचार करून हा निर्णय घेण्यात आला आहे.
अधिकाऱ्यांनी स्पष्ट केले आहे की परीक्षा रद्द करण्यात आलेली नसून ती नव्या तारखेला आयोजित केली जाईल. त्यामुळे विद्यार्थ्यांनी घाबरून जाण्याचे कारण नसल्याचे एनटीएने म्हटले आहे. नवीन परीक्षेचे वेळापत्रक लवकरच जाहीर होणार आहे. २८ मे रोजी परीक्षा देणाऱ्या विद्यार्थ्यांसाठी एनटीए (NTA) स्वतंत्रपणे नवीन वेळापत्रक जाहीर करणार आहे. सुधारित परीक्षेची तारीख, परीक्षा केंद्र, शिफ्ट आणि वेळ यासंबंधीची सर्व माहिती अधिकृत वेबसाइटवर प्रसिद्ध केली जाईल.
यासोबतच संबंधित विद्यार्थ्यांसाठी नवीन प्रवेशपत्रे (Admit Card) देखील जारी केली जाणार आहेत. त्यामुळे विद्यार्थ्यांनी वेळोवेळी अधिकृत संकेतस्थळाला भेट देत अद्ययावत माहिती तपासत राहण्याचे आवाहन करण्यात आले आहे.
प्रवेशपत्र डाउनलोड केल्यानंतर या गोष्टी नक्की तपासा
एनटीएने विद्यार्थ्यांना प्रवेशपत्र डाउनलोड (Admit Card Download) केल्यानंतर त्यावरील सर्व माहिती काळजीपूर्वक तपासण्याचा सल्ला दिला आहे. त्यामध्ये उमेदवाराचे नाव, छायाचित्र (Photo), जन्मतारीख (Date Of Birth), परीक्षेची तारीख, शिफ्ट (Shift), परीक्षा केंद्राचे (Exam Centre) नाव व संपूर्ण पत्ता, निवडलेले विषय आणि प्रश्नपत्रिकेची भाषा यांचा समावेश आहे. याशिवाय परीक्षेसंदर्भातील सर्व सूचना आणि मार्गदर्शक तत्त्वेही बारकाईने वाचणे आवश्यक असल्याचे एनटीएने (NTA) नमूद केले आहे.
परीक्षा केंद्रावर कोणती कागदपत्रे (Documents) आवश्यक?
एनटीएने स्पष्ट केले आहे की वैध प्रवेशपत्राशिवाय (Valid Admit Card) कोणत्याही उमेदवाराला (Candidate) परीक्षा केंद्रात प्रवेश दिला जाणार नाही. विद्यार्थ्यांनी प्रवेशपत्रासोबत आधार कार्ड, पॅन कार्ड, शाळेचे ओळखपत्र किंवा इतर कोणतेही वैध फोटो ओळखपत्र सोबत ठेवणे बंधनकारक आहे. तसेच अलीकडील पासपोर्ट आकाराचा फोटोही विद्यार्थ्यांनी सोबत आणावा, असे निर्देश देण्यात आले आहेत.
अफवांवर विश्वास ठेवू नका; फक्त अधिकृत अपडेट्सच (Official Updates) पाहा
सोशल मीडियावर परीक्षा रद्द झाल्याच्या किंवा संपूर्ण वेळापत्रक बदलल्याच्या विविध अफवा पसरत असल्याचे लक्षात घेऊन एनटीएने विद्यार्थी आणि पालकांना सावध राहण्याचे आवाहन केले आहे. एजन्सीने स्पष्ट केले आहे की सध्या केवळ २८ मे २०२६ रोजीच्या दोन्ही शिफ्टमधील परीक्षा पुढे ढकलण्यात आल्या आहेत. उर्वरित सर्व परीक्षा पूर्वनियोजित वेळापत्रकानुसारच पार पडणार आहेत. त्यामुळे विद्यार्थ्यांनी कोणत्याही अफवांवर विश्वास न ठेवता फक्त एनटीएच्या (NTA) अधिकृत संकेतस्थळावर (Official Website) प्रसिद्ध होणाऱ्या माहितीलाच प्राधान्य द्यावे, असे आवाहन करण्यात आले आहे.