जळगाव : जळगाव (Jalgaon) जिल्ह्यातील जामनेर तालुक्यात रविवारी एक भीषण अपघात झाला. देवदर्शन करून परतणाऱ्या भाविकांच्या क्रूझर (Cruiser) वाहनाला स्विफ्ट डिझायर कारची (Swift Dzire Car) जोरदार धडक बसल्याने दोन महिलांचा जागीच मृत्यू झाला, तर १३ जण जखमी झाले आहेत. ही दुर्घटना मालदाभाडी गावाजवळ घडली.
प्राथमिक माहितीनुसार, क्रूझरमधील (Cruiser) प्रवासी सिहोरे येथे देवदर्शनासाठी गेले होते. दर्शन आटोपून ते आपल्या गावी परतत असताना समोरून येणाऱ्या स्विफ्ट डिझायर कारने (Swift Dzire Car) ओव्हरटेक करण्याच्या प्रयत्नात क्रूझरला जोरदार धडक दिली.
अपघाताची तीव्रता इतकी होती की क्रूझरमधील दोन महिलांचा घटनास्थळीच मृत्यू झाला. तसेच १३ जण जखमी झाले असून काहींची प्रकृती गंभीर असल्याचे सांगितले जात आहे. जखमींमध्ये लहान मुलांचाही समावेश आहे.
घटनेची माहिती मिळताच स्थानिक नागरिक, पोलीस आणि प्रशासनाने तातडीने मदतकार्य सुरू केले. सर्व जखमींना उपचारासाठी जवळच्या रुग्णालयात दाखल करण्यात आले असून अपघाताच्या नेमक्या कारणाचा तपास सुरू आहे.