उत्तर प्रदेश : उत्तर प्रदेशातील (Uttar Pradesh) शामली जिल्ह्यात एका उद्योगपतीच्या मुलाच्या कथित धर्मांतर प्रकरणामुळे मोठी चर्चा सुरू झाली आहे. एका जिम ट्रेनर तरुणीने प्रेमसंबंधातून तरुणाला धर्मांतरासाठी प्रवृत्त केल्याचा आरोप करण्यात आला असून, याप्रकरणी पोलिसांनी गुन्हा दाखल करून पुढील तपास सुरू केला आहे.(UP Religious Conversion)
मिळालेल्या माहितीनुसार, संबंधित तरुण हा औषध व्यवसायाशी संबंधित एका प्रतिष्ठित कुटुंबातील आहे. काही वर्षांपूर्वी तो स्थानिक जिममध्ये जात असताना त्याची ओळख तेथील महिला प्रशिक्षकाशी झाली. ओळखीतून दोघांमध्ये जवळीक वाढली. त्यानंतर तरुणाचे धर्मांतर करण्यात आले आणि बनावट कागदपत्रांच्या आधारे विवाह केल्याचा आरोप कुटुंबीयांनी केला आहे.
कुटुंबीयांच्या म्हणण्यानुसार, गेल्या काही महिन्यांत तरुणाच्या राहणीमानात आणि वागणुकीत मोठे बदल दिसून आले. त्यानंतर त्याच्या कुटुंबाला या संपूर्ण प्रकरणाची माहिती मिळाली. हा विषय सार्वजनिक झाल्यानंतर परिसरात चर्चा सुरू झाली असून काही सामाजिक संघटनांनीही याकडे लक्ष वेधले आहे.
दरम्यान, तरुणाच्या वडिलांनी पोलिसांकडे तक्रार दाखल केली आहे. त्यांच्या तक्रारीत मुलावर मानसिक दबाव टाकून धर्मांतर केल्याचा तसेच कुटुंबाला धमक्या दिल्याचा आरोप करण्यात आला आहे. पोलिसांनी संबंधित तरुणी, तिच्या कुटुंबातील काही सदस्य आणि इतर काही व्यक्तींविरोधात विविध कलमांखाली गुन्हा नोंदवला आहे.
या प्रकरणामुळे परिसरात तणावाचे वातावरण निर्माण झाले होते. परिस्थिती नियंत्रणात ठेवण्यासाठी पोलिसांनी आवश्यक खबरदारी घेतली आहे. तपास यंत्रणा संबंधित कागदपत्रे, आर्थिक व्यवहार आणि इतर पुरावे तपासत असून संपूर्ण प्रकरणाचा सखोल तपास सुरू आहे.
पोलिसांनी अद्याप कोणत्याही निष्कर्षावर पोहोचले नसून तपास पूर्ण झाल्यानंतरच सत्य परिस्थिती स्पष्ट होईल, असे अधिकाऱ्यांनी सांगितले आहे.