प्राजक्ता लवंगारे-वर्मा यांची नियुक्ती
मुंबई : मुंबई महापालिकेच्या अतिरिक्त आयुक्त डॉ. अश्विनी जोशी यांची बदली करून त्यांची नियुक्ती मुंबई महानगर प्रदेश विकास प्राधिकरणाच्या (एमएमआरडीए) अतिरिक्त महानगर आयुक्तपदी करण्यात आली आहे. त्यांच्या जागी वरिष्ठ आयएएस अधिकारी प्राजक्ता लवंगारे-वर्मा यांची अतिरिक्त आयुक्त म्हणून नियुक्ती करण्यात आली आहे.१५ सप्टेंबर २०२३ रोजी अतिरिक्त आयुक्तपदी नियुक्त झालेल्या डॉ. जोशी यांचा कार्यकाळ पूर्ण होण्यास काही महिने बाकी असतानाच त्यांची बदली करण्यात आल्याने प्रशासकीय वर्तुळात चर्चेला उधाण आले आहे. महापालिका आयुक्तपदी आश्विनी भिडे यांची नियुक्ती झाल्यानंतर जोशी यांच्या बदलीची शक्यता व्यक्त केली जात होती.
महापालिकेतील कार्यकाळात डॉ. जोशी यांनी मालमत्ता कर वसुलीत विक्रमी कामगिरी केली. तसेच अतिक्रमण आणि फेरीवाल्यांविरोधातील कारवाईला गती देण्यासाठी त्यांनी सातत्याने प्रयत्न केले. आरोग्य विभागातील त्यांच्या पूर्वीच्या कामगिरीलाही विशेष दाद मिळाली होती.
दरम्यान, पावसाळ्याच्या तोंडावर शहराच्या आपत्कालीन व्यवस्थापनाशी संबंधित महत्त्वाची जबाबदारी सांभाळणाऱ्या अधिकाऱ्याची बदली करण्यात आल्याने आश्चर्य व्यक्त केले जात आहे. मुंबईच्या भौगोलिक परिस्थितीची सखोल माहिती असलेल्या डॉ. जोशी यांच्या बदलीमुळे प्रशासनाच्या निर्णयावर प्रश्नचिन्ह उपस्थित केले जात आहे.नवीन अतिरिक्त आयुक्त प्राजक्ता लवंगारे-वर्मा या २००१ च्या आयएएस तुकडीतील अधिकारी असून त्यांना विविध प्रशासकीय पदांचा अनुभव आहे. त्यांचे वडील मुंबई महापालिकेच्या सेवेत कार्यरत होते, तर आई परिचारिका म्हणून कार्यरत होत्या. मात्र मुंबई महापालिकेच्या व्यापक कामकाजाची माहिती घेण्यासाठी त्यांना काही कालावधी लागणार असल्याचे बोलले जात आहे.