नर्स पत्नीची क्रूरता पाहून पोलीसही हादरले; पतीला मारण्यासाठी आखला प्लॅन
तेलंगणा : तेलंगणामध्ये विवाहबाह्य संबंधातून पतीच्या हत्येचा (Murder) धक्कादायक प्रकार समोर आला आहे. नर्स म्हणून काम करणाऱ्या महिलेने प्रियकर आणि त्याच्या साथीदाराच्या मदतीने 35 वर्षीय पतीची हत्या केल्याचा आरोप असून, या प्रकरणी पोलिसांनी तिघांना अटक केली आहे.
पोलिसांच्या माहितीनुसार, मृत प्रशांत काही दिवसांपूर्वी आखाती देशातून भारतात परतला होता. भारतात आल्यानंतर पत्नीचे विवाहबाह्य संबंध असल्याची माहिती त्याला मिळाली होती. यानंतर पती-पत्नीमध्ये वारंवार वाद होत असल्याचे तपासात समोर आले आहे. (Crime News)
तपासादरम्यान समोर आलेल्या माहितीनुसार, आरोपींनी प्रथम प्रशांतला मद्यपान करून एका इमारतीच्या गच्चीवर नेले आणि खाली ढकलल्याचा आरोप आहे. मात्र, तो गंभीर जखमी अवस्थेत बचावला. त्यानंतर त्याला उपचारासाठी रुग्णालयात दाखल करण्यात आले.
पोलिसांचा आरोप आहे की, रुग्णालयात उपचार सुरू असताना आरोपी पत्नीने नर्स म्हणून असलेल्या ज्ञानाचा वापर करून सलाईनद्वारे टॉयलेट क्लिनर आणि भूल देणारे औषध शरीरात दिले. यानंतर उपचारादरम्यान प्रशांतचा मृत्यू झाला. (wife kills husband)
या प्रकरणात पत्नी, तिचा प्रियकर आणि आणखी एका साथीदाराला पोलिसांनी ताब्यात घेतले आहे. चौकशीदरम्यान आरोपींनी गुन्ह्याची कबुली दिल्याचा दावा पोलिसांनी केला आहे. तिघांनाही न्यायालयात हजर करण्यात आले असून न्यायालयाने त्यांना न्यायालयीन कोठडी सुनावली आहे.
या प्रकरणाचा पुढील तपास पोलीस करत असून मृत्यूचे नेमके कारण आणि इतर पुरावे तपासले जात आहेत.