कर्नाटकमध्ये डॉक्टर पतीची हत्या, कौटुंबिक कारणावरून खून झाल्याचा संशय
धारवाड : कर्नाटकातील धारवाड येथे एका 45 वर्षीय भूलतज्ज्ञाची (Anesthesiologist) त्याच्याच घरात चाकूने वार करून हत्या (Murder) करण्यात आल्याची धक्कादायक घटना समोर आली आहे. या हल्ल्यात डॉक्टरांचा 8 वर्षांचा मुलगा गंभीर जखमी झाला असून त्याच्यावर रुग्णालयात उपचार सुरू आहेत. या प्रकरणी पोलिसांनी डॉक्टरांच्या पत्नीला चौकशीसाठी ताब्यात घेतले असून हत्येमागील कारणांचा शोध सुरू आहे. ( Karnataka News)
मृत डॉक्टरांची ओळख डॉ. किरण होन्ननवार अशी झाली आहे. ते धारवाडमधील एका खासगी रुग्णालयात भूलतज्ज्ञ म्हणून कार्यरत होते. ते कर्नाटक युनिव्हर्सिटी रोडवरील एका अपार्टमेंटमध्ये कुटुंबासह राहत होते. ( Murder Case)
नेमकं काय झालं?
बुधवारी सकाळी डॉ. होन्ननवार यांचा मृतदेह त्यांच्या बेडरूममध्ये रक्ताच्या थारोळ्यात आढळला. त्यांच्या मानेवर धारदार शस्त्राने वार केल्याच्या जखमा होत्या. त्याचवेळी त्यांचा 8 वर्षांचा मुलगाही गंभीर जखमी अवस्थेत सापडला. पोलिसांनी तातडीने मुलाला रुग्णालयात दाखल केले. प्राथमिक तपासात त्याच्यावरही जीवघेणा हल्ला झाल्याचा संशय व्यक्त करण्यात आला आहे.
कौटुंबित वाद असल्याचा संशय
या घटनेनंतर पोलिसांनी घराची पाहणी करून पुरावे गोळा केले. कुटुंबीयांच्या तक्रारीनंतर गुन्हा दाखल करण्यात आला असून, या प्रकरणाचा संबंध कौटुंबिक वादाशी असू शकतो, असा प्राथमिक अंदाज पोलिसांनी व्यक्त केला आहे. (Police Investigation)
धारवाडचे पोलीस आयुक्त एन. शशिकुमार यांनी सांगितले की, घटनेच्या आधी डॉक्टरांच्या मोबाईलवर येणारे फोन त्यांच्या पत्नी प्रिया घेत होत्या. नातेवाईक आणि मित्रांना त्यांनी वेगवेगळी माहिती दिल्यामुळे पोलिसांकडून या बाबीचीही चौकशी केली जात आहे.
घटनेवेळी घरात तिघेच होते
पोलिसांच्या माहितीनुसार, घरात त्या वेळी पती, पत्नी आणि मुलगा एवढेच उपस्थित होते. त्यामुळे नेमके काय घडले, याचा तपास सुरू आहे. पत्नीला चौकशीसाठी ताब्यात घेण्यात आले असून तिची विधाने नोंदवली जात आहेत. हत्येमागील कारण आणि संपूर्ण घटनाक्रम तपास पूर्ण झाल्यानंतरच स्पष्ट होणार असल्याचे पोलिसांनी सांगितले. ( Family Dispute)