अमरावती : आंध्र प्रदेशात कोरोना विषाणूचे नवे रुग्ण आढळल्याने आरोग्य विभाग सतर्क झाला आहे. मंगळवारी राज्यात कोविड-19 चे ७ नवे रुग्ण नोंदविण्यात आले. या नव्या रुग्णांमुळे राज्यातील एकूण सक्रिय आणि नोंदविलेल्या रुग्णांची संख्या २६ वर पोहोचली आहे. आरोग्य विभागाने जारी केलेल्या आकडेवारीनुसार, सध्या परिस्थिती नियंत्रणात आहे.(COVID-19)
आरोग्य विभागाच्या माहितीनुसार, मंगळवारी आढळलेल्या ७ नव्या रुग्णांपैकी सर्वाधिक ४ रुग्ण गुंटूर जिल्ह्यातून नोंदविण्यात आले आहेत. याशिवाय, पूर्व गोदावरी जिल्ह्यात २ तर बापटला जिल्ह्यात १ रुग्णाची पुष्टी झाली आहे. अधिकाऱ्यांनी सांगितले की, हे संसर्ग वेगवेगळ्या ठिकाणी आढळले असून त्यांचा कोणत्याही मोठ्या समूह किंवा क्लस्टर उद्रेकाशी थेट संबंध आढळलेला नाही.(Pune News)
राज्यात आतापर्यंत नोंदविण्यात आलेल्या २६ रुग्णांपैकी १० जणांची प्रकृती लक्षात घेऊन त्यांना रुग्णालयात दाखल करण्यात आले असून त्यांच्यावर उपचार सुरू आहेत. तर ९ रुग्ण घरगुती विलगीकरणात (Home isolation) राहून डॉक्टरांच्या देखरेखीखाली उपचार घेत आहेत.
याशिवाय, दिलासादायक बाब म्हणजे ३ रुग्ण पूर्णपणे बरे झाले असून त्यांना घरी सोडण्यात आले आहे. मात्र, राज्यात आतापर्यंत ४ रुग्णांचा मृत्यू झाल्याची दुर्दैवी नोंद आहे. अधिकाऱ्यांनी स्पष्ट केले की, मृत्यू झालेल्या चारही व्यक्ती पूर्वीपासूनच गंभीर आजारांनी ग्रस्त होत्या. आरोग्य विभाग परिस्थितीवर सातत्याने लक्ष ठेवून असून नागरिकांनी आवश्यक खबरदारी घेण्याचे आवाहन करण्यात आले आहे.