ओंटारियो (कॅनडा): भारताची अव्वल मानांकित स्क्वॅश खेळाडू, अनाहत सिंगने जागतिक ज्युनियर स्क्वॅश चॅम्पियनशिपच्या अंतिम फेरीत पोहोचून इतिहास रचला आहे. २००५ मध्ये जोशना चिनप्पानंतर या प्रतिष्ठित स्पर्धेच्या अंतिम फेरीत पोहोचणारी ती पहिली भारतीय खेळाडू ठरली आहे. महिला एकेरीच्या उपांत्य फेरीत, दिल्लीच्या अनाहतने इजिप्तच्या बार्ब समेहचा ११-३, ८-११, ११-४, ११-६ असा पराभव करून विजेतेपदाच्या सामन्यात प्रवेश केला.
जागतिक क्रमवारीत २० व्या स्थानावर असलेल्या अनाहतने गेल्या वर्षी याच स्पर्धेत कांस्यपदक जिंकले होते. आता ती जागतिक ज्युनियर स्क्वॅश चॅम्पियन बनण्यापासून फक्त एक विजय दूर आहे. जर तिने अंतिम सामना जिंकला, तर ती असे करणारी पहिली भारतीय खेळाडू ठरेल.विजयानंतर अनाहत म्हणाली, "मी खूप आनंदी आहे. काही महिन्यांपूर्वी, मी ब्रिटिश ज्युनियर ओपनमध्ये बार्बविरुद्ध खेळले होते आणि तो सामनाही खूप अटीतटीचा झाला होता. मला माहित होते की यावेळी जिंकण्यासाठी मला माझा सर्वोत्तम खेळ करावा लागेल." (Anahat Singh )
ती पुढे म्हणाली, "काल मी माझा सर्वोत्तम खेळ करू शकले नाही, त्यामुळे स्वतःला सिद्ध करणे महत्त्वाचे होते. मी जागतिक ज्युनियर चॅम्पियनशिपमध्ये चार वेळा खेळले आहे. मी उपांत्यपूर्व फेरी आणि नंतर उपांत्य फेरी गाठली, पण यावेळी अंतिम फेरीत पोहोचल्यामुळे माझे आई-वडील आणि प्रशिक्षक खूप आनंदी आहेत. पण, माझे ध्येय अजून पूर्ण झालेले नाही."अनाहतचा सामना आता अंतिम फेरीत इजिप्तच्या दुसऱ्या मानांकित रुकाया सालेमशी होईल. भारतीय स्क्वॅशच्या इतिहासात एक नवीन अध्याय लिहिण्यासाठी अनाहतला आता केवळ एका विजयाची गरज आहे.(Anahat Singh )