नवी दिल्ली : केंद्रीय पर्यटन मंत्रालयाने नवी दिल्ली येथे भारताला जागतिक स्तरावरील पसंतीचे पर्यटन स्थळ म्हणून पुढे आणण्यासाठी इंटरग्लोब एव्हिएशन लिमिटेड (इंडिगो) यांच्याशी सामंजस्य करार केला. हा करार धोरणात्मक स्वरूपाचा असून, तो केवळ इंडिगोपुरता मर्यादित नसून त्याअंतर्गत कोणतीही आर्थिक बांधिलकी नाही.(Indigo)
या प्रसंगी बोलताना गजेंद्र सिंह शेखावत (Gajendra Singh Shekhawat)म्हणाले की, पर्यटन मंत्रालयाचा प्रमुख ‘इन्क्रेडिबल इंडिया’ (अतुल्य भारत) ब्रँड आणि इंडिगोचे व्यापक देशांतर्गत आणि आंतरराष्ट्रीय जाळे एकत्र आल्यामुळे भारताच्या पर्यटन प्रसाराला अधिक बळ मिळेल. अशा सहकार्यात्मक उपक्रमांमुळे भारतातील पर्यटनविषयक माहिती अधिक व्यापक जनसमुदायापर्यंत पोहोचण्यास मदत होईल आणि जगातील अग्रगण्य पर्यटनस्थळांपैकी एक म्हणून भारताचे स्थान अधिक बळकट होईल, असे त्यांनी नमूद केले.
या सामंजस्य कराराअंतर्गत, पर्यटन मंत्रालय आणि इंडिगो संयुक्तपणे “इन्क्रेडिबल इंडिया बाय इंडिगो” नावाचा जागतिक संवाद उपक्रम राबवतील. ही मोहीम भारताच्या समृद्ध आणि वैविध्यपूर्ण पर्यटन परंपरांचे प्रदर्शन करेल, ज्यामध्ये सांस्कृतिक वारसा, नैसर्गिक सौंदर्य, अध्यात्मिक स्थळे, वेलनेस (आरोग्य पर्यटन), साहसी खेळ, वन्यजीव आणि इतर अनुभवात्मक पर्यटनीय घटकांचा समावेश असेल.
या मोहिमेचा प्रचार डिजिटल आणि मुद्रित माध्यमे, विमानतळांवरील प्रचार माध्यमे, विमानातील (In-flight) माध्यमे, समाजमाध्यमे, आंतरराष्ट्रीय पर्यटन प्रदर्शने तसेच इतर प्रचार माध्यमांद्वारे केला जाईल. पर्यटन मंत्रालय ‘इन्क्रेडिबल इंडिया’ ब्रँडची प्रचार सामग्री आणि इतर साधनसंपत्ती वापरण्याची परवानगी देईल. तसेच, शक्य असेल तेथे मोहिमेच्या उपक्रमांच्या अंमलबजावणीसाठी संबंधित घटकांशी समन्वय साधण्यास सहकार्य करेल.
इंडिगो पर्यटन स्थळांवर आधारित आशय तयार करेल आणि तिच्या ग्राहक संवाद मंचावर भारताच्या पर्यटनविषयक माहितीचा विस्तार करेल. या सहकार्याअंतर्गत पर्यटन प्रोत्साहन उपक्रमांमध्ये संयुक्त सहभाग, विशिष्ट पर्यटनस्थळांवर केंद्रित मोहिमा तसेच देशांतर्गत आणि प्रमुख आंतरराष्ट्रीय बाजारपेठांमध्ये भारताच्या पर्यटन क्षमतेचा प्रभावी प्रचार करण्यासाठी परस्पर संमतीने राबविण्यात येणाऱ्या इतर उपक्रमांचाही समावेश आहे.
हा सामंजस्य करार प्रारंभी दोन वर्षांसाठी वैध असेल. भारताच्या पर्यटन क्षमतेचा प्रचार करणे, आंतरराष्ट्रीय पर्यटकांचे आगमन वाढवणे आणि भारताला जागतिक स्तरावरील आघाडीचे पर्यटनस्थळ म्हणून स्थापित करणे, या पर्यटन मंत्रालय आणि इंडिगो यांच्या सामायिक वचनबद्धतेचे, हे सहकार्य द्योतक आहे.