Ahilyanagar Crime News : अहिल्यानगर जिल्ह्यातील पाथर्डी तालुक्यात एक संतापजनक घटना घडली आहे. पाथर्डी तालुक्यातील एका गावातील साडेतेरा वर्षीय अल्पवयीन मुलीचे अपहरण करून तिच्यावर वारंवार लैंगिक अत्याचार केल्याची संतापजनक घटना उघडकीस आली आहे. या घटनेमुळे पाथर्डी (Pathardi) तालुक्यात एकच खळबळ उडाली असून संतापाची लाट पसरली आहे. (Ahilyanagar Crime News)
नेमकं प्रकरण काय ?
मिळालेल्या प्राथमिक माहितीनुसार, पीडित मुलीचे आई-वडील ऊसतोड मजूर असून ते हंगामी कामासाठी बाहेरगावी जात असल्याची माहिती आहे. ऊसतोडीसाठी कामगार पुरविणाऱ्या मुकादमाच्या मुलाची पीडितेशी ओळख झाली होती. संधीचा फायदा साधून मार्च 2026 मध्ये आरोपीने पीडित मुलीला घरातून जबरदस्तीने घेऊन जाऊन एका ठिकाणी डांबून ठेवले. त्यानंतर पुणे जिल्ह्यातील शिरूर तालुक्यातील न्हावरा येथे नेऊन जीवे मारण्याची धमकी देत तिच्यावर वारंवार अत्याचार केल्याचा आरोप फिर्यादीत करण्यात आला आहे. (Ahilyanagar Crime News)
पाथर्डी पोलीस ठाण्यात तक्रार
दरम्यान, 1 ऑगस्ट रोजी पीडित मुलीने एका अनोळखी महिलेच्या मोबाईलवरून आईशी संपर्क साधला. आपण न्हावरा येथे असल्याची माहिती मोबाईलवरून आईला दिली. त्यानंतर 2 ऑगस्ट रोजी पीडितेच्या आई-वडीलांनी न्हावरा गाठले आणि मुलीला घरी घेऊन आले. घरी आल्यानंतर मुलीने आपल्या आईला आपली आपबिती सांगितली. यानंतर पालकांनी पाथर्डी पोलीस ठाण्यात तक्रार दाखल केली. याप्रकरणी संशयित आरोपी धनंजय आठरे याच्याविरुद्ध बलात्कारासह पोक्सो कायद्यान्वये गुन्हा दाखल करण्यात आला आहे. पुढील तपास पाथर्डी पोलीस (Pathardi Police) करत आहेत. मात्र या घटनेनं शहरात खळबळ उडाली आहे.