नवी दिल्ली: संसदेत सुरू असलेल्या गदारोळादरम्यान पंतप्रधान नरेंद्र मोदी यांनी राष्ट्रीय लोकशाही आघाडीच्या (एनडीए) लोकसभा खासदारांची नाश्त्यावर बैठक घेतली. संसदेच्या कामकाजात सक्रिय सहभाग घेण्याचे आवाहन करताना पंतप्रधान म्हणाले की, संसद हे "लोकशाहीचे सर्वोच्च मंदिर" आहे. अलीकडील गोंधळामुळे नवीन खासदारांना सभागृहात बोलण्याची संधी मिळत नसल्याबद्दल त्यांनी चिंता व्यक्त केली. "हे त्यांच्यावर अन्यायकारक आहे," असे सांगत त्यांनी संसदीय कामकाज सुरळीत चालले पाहिजे, असे प्रतिपादन केले. तसेच नुकतेच एकनाथ शिंदे यांच्या शिवसेनेत प्रवेश केलेले उबाठाचे सहा माजी खासदार आणि तृणमूलच्या बंडखोर खासदारांना आश्वासन देताना पंतप्रधान मोदी म्हणाले की, ते "त्यांच्या पाठीशी आहेत" आणि त्यांनी "कशाचीही काळजी करण्याची गरज नाही."
बैठकीत 'नॅशनल ईस्टर्न सिटिझन्स पार्टी ऑफ इंडिया' , शिवसेना, रिपब्लिकन पार्टी ऑफ इंडिया (आठवले), राष्ट्रीय लोक मोर्चा, अण्णाद्रमुक आणि युपीपीएल या एनडीए घटक पक्षांचे ४० हून अधिक खासदार उपस्थित होते. खासदारांना संसदेचा इतिहास वाचून समजून घेण्याचा सल्ला देत पंतप्रधान म्हणाले, "संसदेत ऐतिहासिक साहित्याचा मोठा साठा आहे; चर्चा तयार करण्यासाठी त्याचा वापर करा. आपापल्या राज्यांच्या विकासासाठी काम करा. राज्ये प्रगती करतील तेव्हाच देश प्रगती करेल." जूनमध्ये २० लोकसभा सदस्यांनी तृणमूल काँग्रेस सोडत अपरिचित अशा एनआयसीपी पक्षात प्रवेश केला होता. तसेच उबाठाच्या ६ खासदारांनी पक्षांतर करून महाराष्ट्राचे उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केला, ज्यामुळे कनिष्ठ सभागृहात शिवसेनेचे संख्याबळ १३ झाले. एनआयसीपीने एनडीएमध्ये प्रवेश केला असून शिवसेना सत्ताधारी आघाडीचा घटक पक्ष म्हणून कायम आहे.
एनडीए हे एक कुटुंब : "एनडीए हे एक कुटुंब आहे. आम्ही घटक पक्षांच्या पाठीशी आहोत. प्रत्येक व्यक्तीचा आदर केला जाईल आणि संधी दिली जाईल. मी फक्त एका घटक पक्षाच्या नव्हे, तर एनडीएच्या प्रत्येक खासदारासोबत आहे. तुम्हाला कोणाचीही भीती बाळगण्याचे कारण नाही," असे ते म्हणाले. खासदारांनी आपल्या मतदारसंघातील विकास प्रकल्प पुढे नेण्यासाठी अधिकारांचा प्रभावी वापर करावा, असे आवाहन त्यांनी केले. "तुमच्या भागातील कोणत्याही विकासाकामासाठी थेट पंतप्रधान कार्यालयाशी संपर्क साधा. गरीब मजूर आणि शेतकऱ्यांसह सर्वांना भेटून त्यांच्या समस्या समजून घ्या," असे ते म्हणाले. त्यानंतर पंतप्रधानांनी प्रत्येक खासदाराशी व्यक्तिगत संवाद साधत त्यांच्या प्रकृतीची चौकशी केली.
विविध मुद्द्यांवर चर्चा : पावसाळी अधिवेशनादरम्यान कायदा व सुव्यवस्था आणि संसदेच्या कामकाजावर चर्चा करण्यासाठी आणि पक्षातील समन्वय अधिक दृढ करण्यासाठी, पंतप्रधानांनी आदल्या दिवशी आपल्या निवासस्थानी भाजपच्या खासदारांसाठी एका रात्रीच्या जेवणाचे आयोजन केले होते, त्यानंतर ही बैठक पार पडली. या अनौपचारिक भेटीदरम्यान पंतप्रधान मोदींनी खासदारांशी आपले वैयक्तिक अनुभव शेअर केले आणि विविध मुद्द्यांवर चर्चा केली. या संवादादरम्यान, पंतप्रधान मोदींनी खासदारांना "दिल्लीच्या राजकारणाच्या जाळ्यात" न अडकण्याचा आणि विरोधी पक्षाच्या सदस्यांशी सलोख्याचे संबंध राखण्याचा सल्लाही दिला.