गडचिरोली : धानोरा तालुक्यातील जपतलाई येथील अनुदानीत आश्रमशाळेत रात्री गाढ झोपलेल्या सहा मुलींना सर्पदंश झाल्याची घटना घडली. सर्पदंशामुळे सहा पैकी तीन मुलींचा मृत्यू झाला. इतर तीन मुलींची प्रकृती गंभीर आहे. या तिघींना एअरलिफ्ट करून रुग्णालयात दाखल करण्यात आले आहे. मुलींवर उपचार सुरू आहेत.
जपतलाई येथे कुप्पा लिंगो शैक्षणिक व संस्कृती विकास संशोधन शाळा तथा अनुदानित आश्रमशाळेच्या वसतिगृहात सर्पदंशाची घटना घडली. सर्पदंशामुळे सुश्मिता सरोजित मंडल (वय १४), दीपिका एतवा लकडा (वय १२), अनु गजुराम कोरेटी (वय ८) यांचा मृत्यू झाला. तर दीपिका बिटलूरसाय मडावी (वय ११), समृद्धी सुरेश नैताम (वय १४), कविता राजकुमार किरंगा (वय १२) यांच्यावर उपचार सुरू आहेत.
आश्रमशाळेत मुली जमिनीवर अंथरलेल्या गाद्यांवर झोपतात. यामुळेच साप आल्याचे त्यांना समजले नाही. जेव्हा सर्पदंशाची घटना घडली त्यावेळी वसतिगृहाच्या महिला अधीक्षक गैरहजर होत्या.
संस्थापक आणि प्रकल्प अधिकारी सुरक्षित वातावरणात वावरत असताना मुलींसाठी एवढे असुरक्षित वातावरण कसे असा प्रश्न आता उपस्थित केला जात आहे. सर्पदंश प्रकरणी चौकशी करून दोषींवर कारवाई करावी अशीही मागणी जोर धरू लागली आहे.
आश्रमशाळेत सुरक्षित वातावरण नसल्यामुळेच तीन मुलींचा जीव गेला आहे. या प्रकरणी प्रकल्प अधिकाऱ्याला तातडीने निलंबित अशी मागणी होऊ लागली आहे.