नवी दिल्ली : नवी दिल्लीतील टिकरी कलान मेट्रो स्टेशनजवळील पेट्रोल पंपावर ट्रकच्या सीएनजी सिलेंडरमध्ये गॅस भरताना अचानक स्फोट झाल्याची भीषण घटना घडली. या दुर्घटनेत सीएनजी पंपावर काम करणाऱ्या तीन कामगारांचा मृत्यू झाला असून, तीन जण गंभीर जखमी झाले आहेत. (Navi Delhi)
मिळालेल्या माहितीनुसार, ट्रकच्या सीएनजी सिलेंडरमध्ये गॅस भरला जात असताना अचानक स्फोट झाला. या स्फोटात मनीष नावाच्या २५ वर्षीय कामगाराचा घटनास्थळीच मृत्यू झाला. तो पश्चिम दिल्लीतील बाबा हरिदास कॉलनीचा रहिवासी होता. तर अन्य दोन जखमींचा रुग्णालयात उपचारादरम्यान मृत्यू झाला. (Delhi Petrol Pump Blast)
या दुर्घटनेत आणखी तीन जण गंभीर जखमी झाले असून, त्यांच्यावर रुग्णालयात उपचार सुरू आहेत. पोलिसांनी दिलेल्या माहितीनुसार, जखमींची प्रकृती चिंताजनक आहे.
घटनेची माहिती मिळताच दिल्ली अग्निशमन दलाने तातडीने घटनास्थळी धाव घेतली. दुपारी ३.३७ वाजता अग्निशमन दलाला घटनेची माहिती मिळाली. त्यानंतर सहा अग्निशमन गाड्या घटनास्थळी पाठवण्यात आल्या. परिसरात पोलीस आणि अग्निशमन दलाचे पथक तैनात करण्यात आले असून परिस्थिती सध्या नियंत्रणात आहे. ( CNG Cylinder Explosion)
दरम्यान, सीएनजी सिलेंडरचा स्फोट नेमका कोणत्या कारणामुळे झाला, हे अद्याप स्पष्ट झालेले नाही. पोलिसांकडून या प्रकरणाचा तपास सुरू असून, स्फोटामागील नेमके कारण शोधले जात आहे.