यूट्यूबवर व्हिडिओ (YouTube Video) तयार करणाऱ्या जगभरातील आणि राज्यातील लाखो क्रिएटर्ससाठी एक महत्त्वाची बातमी समोर आली आहे. कंपनीने आपल्या व्ह्यू काउंटिंग (View Counting) पद्धतीत क्रांतीकारक बदल करण्याची घोषणा केली आहे. येत्या २४ ऑगस्टपासून प्लॅटफॉर्मवरील लाँग-फॉर्म व्हिडिओ आणि शॉर्ट्स अशा दोन्ही फॉरमॅटसाठी एकच समान नियम लागू केला जाणार आहे. नवीन नियमानुसार, प्रेक्षकाने व्हिडिओवर क्लिक करून तो सुरू करताच पहिल्याच सेकंदाला त्याचा एक 'व्ह्यू' म्हणून नोंद केला जाईल. यापूर्वी व्ह्यू मोजण्यासाठी ठरावीक वॉच-टाईमची अट असायची, ती आता पूर्णपणे रद्द करण्यात आली आहे.
या धोरणात्मक बदलामुळे क्रिएटर्सच्या एकूण व्ह्यूजची संख्या वेगाने वाढणार असून, त्याचा थेट फायदा त्यांना ब्रँड स्पॉन्सरशिप आणि कमर्शियल डील्स मिळवताना होणार आहे. प्लॅटफॉर्मवरील सर्व फॉरमॅटमध्ये एकसूत्रीपणा आणणे आणि क्रिएटर्सची खरी पोहोच ब्रँड्ससमोर अधिक पारदर्शकपणे मांडणे, हा यामागील मुख्य उद्देश असल्याचे यूट्यूबने स्पष्ट केले आहे. दरम्यान, या निर्णयामुळे 'यूट्यूब पार्टनर प्रोग्राम' (YPP) अंतर्गत होणाऱ्या नियमित कमाईवर अथवा मोनिटायझेशनच्या नियमांवर कोणताही थेट परिणाम होणार नाही. जरी या निर्णयामुळे व्ह्यूजचा आकडा वाढणार असला, तरी डिजिटल विश्वात यावर संमिश्र प्रतिक्रिया उमटत आहेत. चुकून क्लिक झालेल्या किंवा अवघ्या काही सेकंदांत बंद केलेल्या व्हिडिओंवरही आता व्ह्यू काउंट मिळणार असल्याने 'सरासरी वॉच टाईम' (Average Watch Time) घसरण्याची शक्यता तज्ज्ञांनी व्यक्त केली आहे. मोठे ब्रँड्स प्रायोजकत्व देताना केवळ एकूण व्ह्यूज न बघता व्हिडिओ किती वेळ पाहिला गेला (रिटेन्शन रेट) हेदेखील तपासतात. त्यामुळे व्ह्यूज वाढले तरी वॉच टाईम खराब झाल्यास स्पॉन्सरशिपच्या दरावर त्याचा काय परिणाम होतो, हे पाहणे महत्त्वाचे ठरेल.