पुणे : पिंपरी-चिंचवडमध्ये एका खासगी स्कूल व्हॅनला अचानक आग लागल्याची घटना घडली. काही क्षणांतच आगीने रौद्र रूप धारण केल्याने संपूर्ण व्हॅन जळून खाक झाली. सुदैवाने, घटनेच्या वेळी व्हॅनमध्ये एकही विद्यार्थी नसल्याने मोठी दुर्घटना टळली. (Pune News)
मिळालेल्या माहितीनुसार, आज सकाळी साडेदहा वाजण्याच्या सुमारास ही घटना घडली. स्कूल व्हॅन चालकाने विद्यार्थ्यांना इंदिरा शाळेत सुरक्षितपणे सोडल्यानंतर व्हॅन दुरुस्तीसाठी गॅरेजच्या दिशेने नेली. त्यावेळी गाडी चालवत असताना अचानक धूर येत असल्याचे चालकाच्या लक्षात आले. (Pimpri School Van)
धूर दिसताच चालकाने तातडीने व्हॅन रस्त्याच्या कडेला थांबवली. मात्र, काही क्षणांतच व्हॅनने पेट घेतला आणि आग वेगाने पसरली. पाहता पाहता संपूर्ण व्हॅन आगीच्या भक्ष्यस्थानी पडली. आगीचे स्वरूप लक्षात येताच परिसरातील नागरिकांनीही घटनास्थळी धाव घेतली. (School Van Fire)
घटनेची माहिती मिळताच अग्निशमन दलाचे जवान आणि वाकड पोलीस ठाण्याचे पथक घटनास्थळी दाखल झाले. अग्निशमन दलाच्या जवानांनी पाण्याचा मारा करत आगीवर नियंत्रण मिळवले. मात्र, तोपर्यंत व्हॅनचे मोठे नुकसान झाले होते. (Wakad Police)
दरम्यान, व्हॅनला आग लागली त्यावेळी त्यामध्ये विद्यार्थी नसल्याचे समोर आले आहे. चालकाने सर्व विद्यार्थ्यांना यापूर्वीच शाळेत सोडले होते. त्यामुळे या घटनेत कोणतीही जीवितहानी किंवा दुखापत झाली नाही.
व्हॅनला आग नेमकी कशामुळे लागली, याचे कारण अद्याप स्पष्ट झालेले नाही. प्राथमिक अंदाजानुसार शॉर्टसर्किटमुळे आग लागली असण्याची शक्यता व्यक्त केली जात आहे. मात्र, इतर कोणत्या कारणामुळे ही घटना घडली का, याचा तपास वाकड पोलीस करत आहेत. (Pimpri Chinchwad)