रायपूर : इंदिरा गांधी कृषी विद्यापीठातील (Indira Gandhi Krishi Vishwavidyalaya) पेपरफुटी प्रकरणी एक प्राध्यापक आणि पाच विद्यार्थी अशा एकूण सहा जणांना अटक करण्यात आली आहे. अटकेतील प्राध्यापक खासगी महाविद्यालयात कार्यरत आहे, अशी माहिती छत्तीसगडचे मुख्यमंत्री विष्णू देव साई यांनी दिली. पेपरफुटी प्रकरणी पोलीस तपास सुरू आहे, असेही ते म्हणाले.
पोलीस आणि सायबर तज्ज्ञ संयुक्तपणे पेपरफुटी प्रकरणी तपास करत आहेत. आतापर्यंत हाती आलेल्या माहितीआधारे तपास पथकाने खासगी महाविद्यालयात कार्यरत असलेल्या एका प्राध्यापकाला तसेच पाच विद्यार्थ्यांना अटक केली आहे. इंदिरा गांधी कृषी विद्यापीठात २० ऑगस्ट रोजी बीएससी कृषी कीटकशास्त्र परीक्षेआधी पेपरफुटी झाली. दुर्ग येथील भारती कॉलेजमधून पेपर फुटला. पेपरफुटीचा संशय येताच तपास करण्यासाठी स्थानिक पोलीस आणि गुन्हे शाखेचा समावेश असलेले एक संयुक्त पथक तयार करण्यात आले. या पथकाने अनेक विद्यार्थ्यांची तसेच परीक्षा आयोजन करणाऱ्या यंत्रणेतील निवडक अधिकारी - कर्मचारी यांची चौकशी केल्यानंतर अटकेची कारवाई करण्यात आली.
विद्यापीठातील एक प्राध्यापक एका सीलबंद पाकिटातून प्रश्नपत्रिका विद्यापीठातून बाहेर नेण्यासाठी जबाबदार होते. त्यांनी पाकिटाच्या तळाशी एक लहान छिद्र करून, संपूर्ण प्रश्नपत्रिका स्कॅन करण्यासाठी त्यात एक एंडोस्कोपिक कॅमेरा घातला, हाताने १५ प्रश्न उतरवून घेतले आणि हे उतरवून घेतलेले प्रश्न विद्यार्थ्यांना विकले. ज्या विद्यार्थ्यांनी ही प्रश्नपत्रिका मिळवली होती, त्यांच्यापर्यंत पोहोचून संपूर्ण प्रकरणाचा छडा लावला आणि सहा जणांना अटक केली आहे. पुढील तपास सुरू आहे, असे गुन्हे शाखेचे डीसीपी स्मृतीक राजनाला यांनी सांगितले. आरोपीने प्रश्न हजारो रुपयांना विकल्याची कबुली दिल्याचे ते म्हणाले.