नवी दिल्ली : बंगालच्या उपसागरात शनिवारी पनामा ध्वज असलेले मालवाहू जहाज बुडाल्याची धक्कादायक घटना घडली. हे जहाज ओडिशातील पारादीप किनाऱ्यापासून सुमारे २४० नॉटिकल मैल अंतरावर समुद्रात बुडाले. जहाजावर एकूण २४ क्रू मेंबर्स असल्याची माहिती अधिकाऱ्यांनी दिली आहे. दुर्घटनेनंतर भारतीय तटरक्षक दल आणि भारतीय नौदलाकडून शोध आणि बचाव मोहीम सुरू करण्यात आली आहे. (Odisha Ship Accident)
लोहखनिज घेऊन सिंगापूरच्या दिशेने प्रवास :
मिळालेल्या माहितीनुसार, हे मालवाहू जहाज ओडिशातून लोहखनिज घेऊन सिंगापूरच्या दिशेने निघाले होते. २० ऑगस्ट रोजी जहाज पारादीप बंदरात दाखल झाले होते. त्यानंतर शुक्रवारी ते पुढील प्रवासासाठी रवाना झाले. मात्र, बंगालच्या उपसागरात पोहोचल्यानंतर जहाजाचा अपघात झाला आणि ते समुद्रात बुडाले. हे जहाज जगतसिंगपूर जिल्ह्यातील पारादीप किनाऱ्यापासून सुमारे ४४४ किलोमीटर अंतरावर बुडाल्याचे सांगण्यात येत आहे. (Odisha Ship Accident)
भारतीय तटरक्षक दल, नौदलाचे बचावकार्य सुरू :
जहाज बुडाल्याची माहिती मिळताच भारतीय तटरक्षक दल आणि भारतीय नौदलाने तातडीने शोध आणि बचाव मोहीम सुरू केली. परिसरातून जाणाऱ्या इतर जहाजांनाही सतर्क करण्यात आले असून बचावकार्यात मदत करण्याच्या सूचना देण्यात आल्या आहेत. मात्र, जहाजावरील २४ क्रू मेंबर्सपैकी आतापर्यंत नेमके किती जणांना सुरक्षित बाहेर काढण्यात आले आहे, याबाबत अद्याप स्पष्ट माहिती मिळालेली नाही. अधिकारी समुद्रात शोधमोहीम राबवत असून क्रू मेंबर्सचा शोध घेत आहेत. (Odisha Ship Accident)
बहुतांश क्रू मेंबर्स चिनी नागरिक :
एका वरिष्ठ IPS अधिकाऱ्याने दिलेल्या माहितीनुसार, जहाजावरील क्रू मेंबर्सपैकी बहुतांश जण चिनी नागरिक असल्याचे समोर आले आहे. मात्र, किती जणांची सुटका झाली आहे किंवा किती जण अद्याप बेपत्ता आहेत, याबाबत अधिकृत माहिती अद्याप समोर आलेली नाही. (Odisha Ship Accident)
जहाज नेमके कशामुळे बुडाले?
जहाज बुडण्यामागचे नेमके कारण अद्याप स्पष्ट झालेले नाही. हवामान, तांत्रिक बिघाड किंवा इतर कोणत्या कारणामुळे ही दुर्घटना घडली, याबाबत अधिकृत माहिती मिळालेली नाही. भारतीय तटरक्षक दल आणि नौदलाचे बचावकार्य सुरू असून शोधमोहीम पुढे गेल्यानंतर जहाज बुडण्याचे कारण आणि २४ क्रू मेंबर्सच्या सद्यस्थितीबाबत अधिक माहिती समोर येण्याची शक्यता आहे. (Odisha Ship Accident)