Vande Bharat Sleeper: रात्री वाराणसीला शांत झोपायचं अन् सकाळी दिल्लीत उठायचं! वंदे भारत स्लीपरचं पाहा संपूर्ण शेड्युल

नवी दिल्ली: गेल्या काही दिवसांपूर्वी भारतीय रेल्वेकडून 'नाईट ट्रेन'ची घोषणा करण्यात आली होती. ही एक्स्प्रेस उत्तर प्रदेश ते नवी दिल्ली मार्गावर धावणार आहे. उत्तर प्रदेश ते नवी दिल्ली मार्गिकेवर 'वंदे भारत स्लीपर एक्स्प्रेस' धावणार आहे. भारतीय रेल्वेकडून आधुनिक रेल्वे सुरू केली जाणार आहे. आधुनिक 'नाईट ट्रेन'च्या सेवांच्या विस्ताराचा भाग म्हणून, वाराणसी आणि नवी दिल्ली दरम्यान नवीन 'वंदे भारत स्लीपर एक्सप्रेस' सुरू केली जाणार आहे. या सेवेमुळे दोन्ही शहरातील कनेक्टिव्हिटी सुधारणार असून पर्यटनाला अधिक चालना मिळणार आहे. शिवाय, लांब पल्ल्याचा रात्रीचा प्रवास करणाऱ्या प्रवाशांना आधुनिक, आरामदायक आणि सोयीस्कर पर्याय मिळेल.

उत्तर प्रदेशचे मुख्यमंत्री योगी आदित्यनाथ आणि केंद्रीय रेल्वे मंत्री अश्विनी वैष्णव उद्या (31 ऑक्टोबर- शनिवार) वाराणसी ते नवी दिल्ली दरम्यान धावणाऱ्या या नवीन 'वंदे भारत स्लीपर एक्सप्रेस' हिरवा झेंडा दाखवून रवाना करणार आहेत. जानेवारी 2026 मध्ये हावडा- गुवाहाटी मार्गावर (दोन्ही दिशांसाठी) 'वंदे भारत स्लीपर एक्स्प्रेस' सेवा सुरू करण्यात आली होती. हावडा- गुवाहटीनंतर आता देशातील प्रमुख शहरांमध्येही 'नाईट ट्रेन' चालवली जाणार आहे. या नवीन सेवेमुळे देशातील प्रवाशांनाही या अत्याधुनिक गाड्यांचा लाभ मिळणार आहे. प्रगत प्रवासी सुविधा, आधुनिक सुरक्षा प्रणाली आणि उत्तम डिझाइन केलेल्या स्लीपिंग बर्थ्सनी सज्ज असलेली ही एक्स्प्रेस, लांब पल्ल्याचा रात्रीचा प्रवास अधिक आरामदायक, विश्वासार्ह आणि प्रवासी- केंद्रित बनवण्याच्या भारतीय रेल्वेच्या वचन बद्धतेचे प्रतीक आहे.

वाराणसी शहराला प्रमुख तीर्थक्षेत्र म्हणून समजले जाते, तर नवी दिल्ली देशाची राजधानी आहे. वाराणसी आणि नवी दिल्ली ह्या दोन्हीही शहरांच्या दरम्यानच्या 'वंदे भारत स्लीपर एक्सप्रेस' सेवेमुळे, देशातील एक महत्त्वाचे आध्यात्मिक आणि सांस्कृतिक केंद्र असलेल्या वाराणसी आणि राष्ट्रीय राजधानी यांच्यातील रेल्वे संपर्क अधिक सक्षम करेल. वाराणसीमध्ये वर्षभर भाविक, देशी- विदेशी पर्यटक, विद्यार्थी आणि इतर प्रवाशांची मोठी वर्दळ असते. नवी दिल्लीसोबतची सुधारित रात्रीची रेल्वे सेवा धार्मिक, शैक्षणिक, व्यावसायिक, प्रशासकीय किंवा पर्यटनाच्या उद्देशाने प्रवास करणाऱ्यांसाठी अत्यंत सोयीस्कर ठरेल. ही रेल्वे सेवा वाराणसी, प्रयागराज, कानपूर सेंट्रल, अलीगड आणि गाझियाबाद स्थानकांवर थांबून नवी दिल्लीला पोहोचेल. ही स्थानके प्रमुख शहरी केंद्रांशी रेल्वे संपर्क प्रदान करतात आणि आसपासच्या जिल्ह्यांतील प्रवाशांनाही याचा लाभ मिळवून देतात, ज्यामुळे आधुनिक रेल्वे प्रवासाच्या सुविधांचा फायदा अधिक प्रवाशांपर्यंत पोहोचतो.

ही एक्स्प्रेस वाराणसी स्थानकावरून रात्री 08.50 वाजता सुटेल आणि दुसऱ्या दिवशी सकाळी 06.10 वाजता नवी दिल्ली स्थानकावर पोहोचेल. तर, परतीच्या प्रवासासाठी, ही एक्स्प्रेस नवी दिल्लीवरून रात्री 09:40 वाजता सुटेल आणि दुसऱ्या दिवशी सकाळी 07.10 वाजता वाराणसी स्थानकावर पोहोचेल. सध्याच्या 'शिव गंगा एक्सप्रेस'च्या तुलनेत, 'वंदे भारत स्लीपर एक्सप्रेस'मुळे वाराणसी ते नवी दिल्ली प्रवास वेळेत 55 मिनिट लवकर आणि नवी दिल्ली ते वाराणसी प्रवास 35 मिनिटे लवकर पूर्ण होणार आहे. 'नाईट ट्रेन'च्या प्रवासामुळे प्रवाशांचा दोन्ही दिशांचा रात्रीचा प्रवास कमी वेळात पूर्ण होईल. शुक्रवारी वाराणसीहून आणि शनिवारी नवी दिल्लीहून वगळता आठवड्यातील इतरत्र सहा दिवस ही एक्स्प्रेस प्रवाशांच्या सेवेमध्ये धावणार आहे.

रात्रीच्या वेळापत्रकामुळे प्रवासी संध्याकाळी आपला प्रवास सुरू करून दुसऱ्या दिवशी सकाळी आपल्या गंतव्यस्थानी पोहोचू शकतात, ज्यामुळे प्रवाशांचा वेळ अधिक वाचणार आहे. ही सेवा विशेषतः तीर्थयात्री, पर्यटक, विद्यार्थी आणि नोकरीनिमित्त प्रवास करणाऱ्या व्यावसायिक आणि पूर्व उत्तर प्रदेश व राष्ट्रीय राजधानी क्षेत्र (NCR) दरम्यान वारंवार प्रवास करणाऱ्या कुटुंबांसाठी अत्यंत फायदेशीर ठरेल. दरम्यान, लांब पल्ल्याच्या प्रवासासाठी डिझाइन केलेली 'वंदे भारत स्लीपर' ट्रेन आधुनिक तंत्रज्ञान, प्रगत सुरक्षा प्रणाली आणि प्रवाशांसाठी सोयीस्कर अशा सुविधांनी सज्ज आहे. दीर्घ अंतराच्या रात्रीच्या प्रवासात प्रवाशांना अधिक आरामदायी आणि सोयीस्कर अनुभव देणे हा याचा मुख्य उद्देश आहे. यामध्ये झोपण्याची व्यवस्था, स्वच्छता, सुरक्षा, हालचालींसाठी मोकळी जागा आणि इतर अनेक प्रवासी सुविधांवर विशेष भर देण्यात आला आहे.

वंदे भारत स्लीपरचे प्रमुख वैशिष्ट्ये

• विद्युत प्रणाली आणि कार्यक्षमता

1. ऊर्जा कार्यक्षमतेसाठी 'रिजनरेटिव्ह ब्रेकिंग सिस्टम' (Regenerative Braking System).


2. 'अंडर-स्लंग' (Under-slung) प्रोपल्शन सिस्टम.


3. प्रगत एरोडायनामिक डिझाइन, सुलभ प्रवेग (acceleration) आणि कोणताही झटका न बसता होणारा प्रवास.

• डिझाइन आणि इतर सुविधा

1. डब्यांचे (Coach) बाह्य रूप 'ऑस्टेनिटिक स्टेनलेस स्टील' (SS) पासून बनवलेले असून, ते 'EN 15227' क्रॅशवर्थिनेस (अपघातरोधक) मानकांचे पालन करते.


2. पूर्णपणे सीलबंद, लवचिक गँगवे (दोन डब्यांना जोडणारा मार्ग), ज्यामध्ये 'क्विक-रिलीज' यंत्रणा बसवलेली आहे.


3. मध्यवर्ती नियंत्रण असलेले, स्वयंचलित 'स्लाइडिंग प्लग डोअर्स' (sliding plug doors). * डब्यांच्या आतील आवाज कमी करण्यासाठी ध्वनीरोधक (साऊंड इन्सुलेशन) आणि ध्वनी नियंत्रण उपाय.


4. थेट आणि अप्रत्यक्ष प्रकाशासाठी एलईडी (LED) प्रकाश व्यवस्था.


5. सेन्सरवर आधारित आपापसांत जोडणारे (इंटरकम्युनिकेशन) दरवाजे.

• सुरक्षा आणि सुरक्षितता

1. EN 45545 मानकाच्या HL3 श्रेणीचे पालन करणारी अग्निसुरक्षा प्रणाली


2. प्रत्येक कोचमध्ये अग्निरोधक दरवाजे


3. ट्रेन कोलिजन अव्हॉइडन्स सिस्टम (TCAS - रेल्वे धडक प्रतिबंधक प्रणाली)


4. आपत्कालीन व्यवस्थापनासाठी आपत्कालीन प्रकाश व्यवस्था


5. आग आणि धूर शोधणारी प्रणाली (Fire and Smoke Detection System - FDS)


6. सुरक्षा आणि प्रवाशांच्या देखरेखीसाठी सीसीटीव्ही (CCTV) कॅमेरे


7. प्रवाशांच्या धोक्याच्या सूचनांसाठी (अलार्म) आपत्कालीन पुश बटणे

• सोयी-सुविधा आणि प्रवाशांसाठी सुविधा

1. व्हॅक्यूम इव्हॅक्युएशन सिस्टमसह सुसज्ज, दुर्गंधीमुक्त आणि सोयीस्कर आधुनिक प्रसाधनगृहे


2. दिव्यांग व्यक्तींसाठी विशेष स्लीपिंग बर्थ (झोपण्यासाठी जागा) आणि प्रसाधनगृहे


3. सामानासाठी पुरेशी जागा यांसारख्या प्रवाशांसाठीच्या आधुनिक सोयी-सुविधा


4. थ्री-पिन चार्जिंग सॉकेट्स आणि स्विचेस