Kanpur Viral News: करवा चौथचा सण विवाहित महिलांसाठी विशेष महत्त्वाचा मानला जातो. पतीच्या दीर्घायुष्यासाठी महिला दिवसभर उपवास करतात आणि रात्री चंद्रदर्शनानंतर पूजा करून उपवास सोडतात. मात्र, उत्तर प्रदेशातील कानपूरमध्ये करवा चौथच्या दिवशी एक वेगळीच घटना घडल्याचे वृत्त समोर आले आहे. एका तरुणाच्या तीन पत्नींमध्ये पतीसोबत आधी पूजा कोण करणार, यावरून वाद झाला. हा वाद थेट पोलीस ठाण्यापर्यंत पोहोचला.
Mumbai Weather: मुंबईत शुक्रवारी (30 ऑक्टोबर) सकाळी अवकाळी पावसाच्या हलक्या सरी आणि धुरकट वातावरणाचा अनुभव आला. दादर, माटुंगा आणि गोरेगावसह पश्चिम उपनगरांतील ...
पहिली पूजा कोण करणार? तीन पत्नींमध्ये वाद
मिळालेल्या माहितीनुसार, ही घटना कानपूरमधील बिठूर परिसरातील एका गावात घडली. संबंधित तरुणाचे पहिले लग्न झाले होते. मात्र, अनेक वर्षे त्यांना मूलबाळ झाले नव्हते. त्यानंतर पहिल्या पत्नीनेच आपल्या मैत्रिणीसोबत पतीचे दुसरे लग्न लावून दिल्याचे सांगितले जाते. दुसऱ्या पत्नीपासून या तरुणाला एक मुलगी झाली. त्यानंतर त्याने तिसरे लग्न केले.
करवा चौथच्या दिवशी तिन्ही पत्नी पतीसोबत पूजा करण्यासाठी एकत्र आल्या. मात्र, पतीसोबत आधी पूजा करण्यावरून त्यांच्यात वाद सुरू झाला. हा वाद वाढल्यानंतर पहिली आणि दुसरी पत्नी मंधाना पोलीस ठाण्यात पोहोचल्या. तिसरी पत्नीही पोलीस ठाण्याबाहेर उपस्थित होती.
पोलिसांसमोर बराच वेळ चर्चा आणि समजूत काढण्याचे प्रयत्न झाले. त्यानंतर काही काळासाठी वाद मिटल्याचे दिसले. मात्र, पोलीस ठाण्याबाहेर पडल्यानंतर पुन्हा तिघींमध्ये वाद झाल्याचे सांगितले जाते. अखेरीस तिन्ही महिलांनी एकत्र करवा चौथची पूजा आणि उपवास करण्याचे ठरवल्याचे वृत्त आहे. दरम्यान, बिठूर पोलीस ठाण्याच्या निरीक्षकांनी या प्रकरणाची माहिती नसल्याचे सांगितले.
प्रियकराच्या घरीच उपवास सोडण्याचा तरुणीचा आग्रह
कानपूरमधून करवा चौथशी संबंधित आणखी एक घटना समोर आली आहे. बिठूर परिसरातील एका तरुणीने आपला उपवास केवळ प्रियकराच्या घरीच सोडण्याचा आग्रह धरला. या दोघांचे अनेक वर्षांपासून प्रेमसंबंध असल्याचे सांगितले जाते. त्यांची घरे एकमेकांसमोर आहेत.
मिळालेल्या वृत्तानुसार, कुटुंबीयांचा विरोध असल्याने ते यापूर्वी भाड्याच्या खोलीत एकत्र राहत होते. प्रौढ झाल्यानंतर तरुणाने कुटुंबीयांसमोर प्रेमविवाहाचा प्रस्ताव ठेवला; मात्र सुरुवातीला त्याला विरोध करण्यात आला.
करवा चौथच्या दिवशी तरुणी आपल्या प्रियकरासोबत मंधाना पोलीस ठाण्यात पोहोचली. तिने प्रियकराच्या घरीच उपवास सोडण्याचा आग्रह धरला. तरुणाने तिला घरी घेऊन जाण्यासाठी पोलीस संरक्षणाची मागणी केली. यानंतर दोन्ही कुटुंबांमध्ये पोलिसांसमोर बराच वेळ चर्चा झाली. अखेरीस तरुणाच्या कुटुंबीयांनी लग्नाला संमती दिल्याचे सांगितले जाते. त्यानंतर तरुणी प्रियकराच्या घरी गेली आणि तिथे तिने उपवास सोडला.
अशा प्रकारे करवा चौथच्या दिवशी कानपूरमध्ये दोन वेगवेगळ्या कौटुंबिक प्रकरणांची चर्चा रंगली.