बारामती : राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांचे स्वीय सहाय्यक अजित दशावतारे यांच्या १४ वर्षीय मुलीचा बारामतीत दुर्दैवी मृत्यू झाल्याची घटना समोर आली आहे. बारामती शहरातील रुई परिसरातील साई गणेश नगर येथे ही घटना घडली. पोलिसांनी दिलेल्या माहितीनुसार, २२ ऑगस्ट रोजी आई रागावल्यामुळे मुलगी घरातून निघून गेली होती. ती रात्री घरी परतली नाही. बराच शोध घेऊनही तिचा ठावठिकाणा न लागल्याने २५ ऑगस्ट रोजी कुटुंबीयांनी बारामती पोलिसांकडे तक्रार दाखल केली. सुरुवातीला अपहरणाचा संशय व्यक्त करण्यात आला होता.तक्रार मिळाल्यानंतर पोलिसांनी तपास सुरू केला. शोधमोहीमेदरम्यान शहरातील एका पाच मजली इमारतीत मुलीचा मृतदेह आढळून आला. घटनास्थळी तपास केल्यानंतर पोलिसांना काही महत्त्वाचे पुरावे मिळाले.
अपर पोलीस अधीक्षक गणेश बिरादार यांनी पत्रकार परिषदेत दिलेल्या माहितीनुसार, इमारतीच्या गच्चीचा दरवाजा बाहेरून बंद असल्याचे आढळले, तर मुलीची चप्पलही घटनास्थळी मिळाली. उपलब्ध तांत्रिक आणि प्रत्यक्ष पुराव्यांच्या आधारे मुलीने इमारतीवरून उडी घेतल्याचे तपासात निष्पन्न झाल्याचे पोलिसांनी सांगितले. या घटनेमागे आई रागावल्याने आलेला राग हे प्राथमिक कारण असल्याचे पोलिसांनी सांगितले आहे. मात्र, प्रकरणाचा पुढील तपास सुरू आहे. या दुर्दैवी घटनेमुळे बारामती परिसरात हळहळ व्यक्त होत असून पोलिसांकडून पुढील कायदेशीर प्रक्रिया सुरू आहे.