नागपूर : नागपूर शहरातील काही नामांकित शाळांना बॉम्बस्फोटाची धमकी देणारे ईमेल मिळाल्यानंतर सुरक्षेचा प्रश्न निर्माण झाला आहे. त्यामुळे खबरदारीचा उपाय म्हणून शहरातील अनेक शाळांनी 31 ऑगस्ट रोजी विद्यार्थ्यांना शाळेत न बोलावण्याचा निर्णय घेतला आहे. काही शाळांमध्ये प्रत्यक्ष वर्गांऐवजी ऑनलाइन शिक्षण सुरू ठेवले जाणार आहे.
मिळालेल्या माहितीनुसार, 18 ऑगस्ट रोजी नागपूरमधील डझनहून अधिक शाळांसह काही सरकारी संस्थांना धमकीचे ईमेल प्राप्त झाले होते. 31 ऑगस्ट रोजी शाळांमध्ये बॉम्बस्फोट घडवून आणण्याची धमकी या ईमेलमध्ये देण्यात आली होती. ईमेल मिळाल्यानंतर शाळा प्रशासनाने तातडीने पोलिसांना माहिती दिली.
घटनेची माहिती मिळताच पोलिसांनी मोठी तपासणी मोहीम सुरू केली. 600 हून अधिक पोलीस कर्मचारी, बॉम्ब शोधक पथके आणि श्वान पथकांच्या मदतीने विविध शाळा आणि परिसराची तपासणी करण्यात आली. मात्र, तपासणीदरम्यान कोणतेही स्फोटक किंवा संशयास्पद वस्तू आढळली नाही.
https://www.prahaar.in/2026/08/31/provocative-video-goes-viral-following-clash-during-eid-e-milad-procession-kalachowki-police-register-two-cases/पोलिसांनी सुरुवातीला ही धमकी अफवा असल्याचे सांगितले होते. मात्र, विद्यार्थ्यांच्या सुरक्षेच्या दृष्टीने शाळांनी कोणताही धोका पत्करण्याचे टाळले आहे. त्यामुळे अनेक शाळांनी 31 ऑगस्टला शाळा बंद ठेवण्याचा निर्णय घेतला आहे. काही शाळांनी विद्यार्थ्यांचे शैक्षणिक नुकसान होऊ नये म्हणून ऑनलाइन वर्ग घेण्याची तयारी केली आहे.
दरम्यान, या प्रकरणी सायबर सेलने गुन्हा दाखल केला असून धमकीचे ईमेल नेमके कोणी पाठवले, याचा तपास सुरू आहे. ईमेलचा स्रोत आणि पाठवणाऱ्याची ओळख शोधण्यासाठी पोलीस तांत्रिक तपास करत आहेत. यासाठी ईमेल सेवा पुरवठादाराशीही संपर्क साधला जात आहे.
सुरक्षेच्या कारणास्तव शाळा बंद ठेवण्याचा निर्णय घेतला असला तरी पालकांनी घाबरून न जाता शाळा प्रशासन आणि पोलिसांकडून मिळणाऱ्या अधिकृत सूचनांचे पालन करावे, असे आवाहन करण्यात येत आहे.
