पटाया : थायलंडचे प्रसिद्ध पर्यटन शहर असलेल्या पटाया (Pattaya) मध्ये सध्या पोलिसांकडून देहविक्री करणाऱ्या महिला आणि संबंधित टोळ्यांविरोधात एक मोठी धडक मोहीम हाती घेण्यात आली आहे. अमेरिकेचे तब्बल ५,००० सैनिक घेऊन येणारी 'USS अब्राहम लिंकन' ही प्रसिद्ध विमानवाहू युद्धनौका (Aircraft Carrier) २ सप्टेंबर ते ६ सप्टेंबर दरम्यान पटाया किनाऱ्याजवळ थांबणार आहे. या सैनिकांच्या आगमनादरम्यान शहरात कोणताही गैरप्रकार घडता कामा नये आणि कायदा-सुव्यवस्था राखली जावी, यासाठी स्थानिक प्रशासनाने आणि पोलिसांनी ही कडक कारवाई सुरू केली आहे.
२५० दिवसांच्या समुद्र प्रवासानंतर सैनिकांना मिळाली सुट्टी
अमेरिकन नौदलाची 'USS अब्राहम लिंकन' ही युद्धनौका गेल्या २५० दिवसांपासून समुद्रात कार्यरत होती. मध्यपूर्वेत इराणविरोधातील लष्करी मोहिमांमध्ये ती तैनात होती. सततच्या प्रदीर्घ प्रवासानंतर आणि कठीण मोहिमांनंतर सैनिकांना काही दिवस विश्रांती (Shore Leave) मिळावी, यासाठी ही युद्धनौका थायलंडमधील 'लॅम छाबांग' बंदरावर येत आहे. या जहाजावर सुमारे ५ हजार अमेरिकन खलाशी, मरीन आणि फायटर पायलट सवार आहेत.
सेलम : तमिळनाडूतील सेलम (Taamilnadu Crime News) जिल्ह्यात एक अत्यंत भयानक आणि मन सुन्न करणारी घटना उघडकीस आली आहे. घराच्या छतावर असलेल्या पाण्याच्या टाक्यांमध्ये ...
मंदीत सापडलेल्या पर्यटन व्यवसायाला आशेचा किरण
गेल्या काही महिन्यांत मध्यपूर्वेतील युद्ध आणि तणावामुळे पटायातील पर्यटन व्यवसायाला मोठा फटका बसला होता. त्यामुळे ५ हजार अमेरिकन सैनिकांच्या आगमनाने शहराच्या अर्थव्यवस्थेला पुन्हा उभारी मिळेल, अशी आशा स्थानिक हॉटेल आणि क्लब व्यावसायिकांना आहे. परंतु, अनुचित प्रकार टाळण्यासाठी पटाया प्रशासनाने सैनिकांसाठी आणि स्थानिक व्यावसायिकांसाठी कडक नियमावली आखली आहे, अमेरिकन सैनिकांना रात्री २ वाजेनंतर कोणत्याही बार किंवा नाइटलाईफच्या ठिकाणी थांबण्यास बंदी असेल. सैनिकांना गांजा (Cannabis) विक्रीची दुकाने, मेडिकल स्टोअर्स आणि काही धोकादायक वॉटर स्पोर्ट्समध्ये जाण्यास बंदी घालण्यात आली आहे. स्थानिक व्यावसायिकांनी सैनिकांकडून अवाजवी पैसे उकळू नयेत किंवा त्यांची फसवणूक करू नये, असा स्पष्ट इशारा प्रशासनाने दिला आहे.
समुद्रकिनाऱ्यावर पोलिसांची रात्रंदिवस गस्त; ५० जणींना घेतले ताब्यात
सैनिकांच्या सुरक्षेसाठी आणि शहराची प्रतिमा सुधारण्यासाठी पटाया पोलीस सध्या समुद्रकिनारे आणि नाइटलाईफच्या भागात रात्रंदिवस गस्त घालत आहेत. थाई प्रसारमाध्यमांनी दिलेल्या माहितीनुसार, आतापर्यंत देहविक्रीत सहभागी असलेल्या जवळपास ४० ते ५० जणींना पोलिसांनी ताब्यात घेतले आहे. नुकत्याच २९ ऑगस्ट रोजी पटाया बीचवर टाकलेल्या छाप्यात १८ थाई, ५ लाओस आणि २ युगांडाच्या महिलांसह २५ जणींना पकडण्यात आले. थायलंडच्या कायद्यानुसार कागदोपत्री देहविक्री बेकायदेशीर असली, तरी पटायामध्ये ती उघडपणे चालते. मात्र, अमेरिकन सैनिकांच्या आगमनामुळे सध्या प्रशासनाने शून्य सहनशीलता (Zero Tolerance) धोरण स्वीकारले आहे.
मोठा आर्थिक फायदा, पण सुरक्षेची चिंता काय?
पटाया शहराच्या महापौरांच्या अंदाजानुसार, प्रत्येक अमेरिकन सैनिक शहरात दररोज ३० ते ९० डॉलर (सुमारे १,००० ते ३,००० थाई बात) खर्च करेल. यामुळे शहरातील दुकाने, हॉटेल्स आणि वाहतूक क्षेत्राला लाखो रुपयांचा आर्थिक फायदा होईल. मात्र, दुसरीकडे आरोग्य आणि सामाजिक तज्ज्ञांनी चिंता व्यक्त केली आहे. एवढ्या मोठ्या संख्येने सैनिक शहरात आल्यास शोषणाच्या घटना आणि लैंगिक आजारांचा प्रसार होण्याचा धोका वाढू शकतो. त्यामुळे या अमेरिकन सैनिकांचे आदरातिथ्य करतानाच शहराची सुरक्षा, आरोग्य आणि कायदा-सुव्यवस्था राखण्याचे दुहेरी आव्हान सध्या थायलंड प्रशासनासमोर उभे राहिले आहे.