PM Narendra Modi : एसआरसीसीच्या शताब्दी सोहळ्यासाठी पंतप्रधान मोदींचा मेट्रोने प्रवास; विद्यार्थ्यांशी व प्रवाशांशी साधला संवाद

नवी दिल्ली : दिल्लीतील श्री राम कॉलेज ऑफ कॉमर्सच्या (SRCC) शताब्दी सोहळ्यासाठी पंतप्रधान नरेंद्र मोदी यांनी शनिवारी दिल्ली मेट्रोने प्रवास केला. ५ सप्टेंबर रोजी शिक्षक दिनानिमित्त एसआरसीसीचा शताब्दी सोहळा आयोजित करण्यात आला होता. या कार्यक्रमाला जाण्यापूर्वी मोदींनी मेट्रो प्रवासादरम्यान विद्यार्थी आणि इतर प्रवाशांशी संवाद साधला. (PM Narendra Modi)

मेट्रो प्रवासादरम्यान पंतप्रधान मोदी विद्यार्थ्यांशी गप्पा मारताना दिसले. त्यांनी प्रवाशांशी हस्तांदोलन करून त्यांची विचारपूस केली. या अनपेक्षित भेटीमुळे नेहमीचा मेट्रो प्रवास प्रवाशांसाठी विशेष ठरला. मोदींच्या हातात मेट्रो कार्ड असल्याचेही दिसून आले. (PM Narendra Modi)

SRCCचा १०० वर्षांचा प्रवास

श्री राम कॉलेज ऑफ कॉमर्सची स्थापना १९२६ मध्ये झाली असून, यंदा संस्थेने १०० वर्षे पूर्ण केली आहेत. वाणिज्य आणि अर्थशास्त्राच्या क्षेत्रातील देशातील प्रतिष्ठित संस्थांमध्ये एसआरसीसीचा समावेश होतो. शताब्दी सोहळ्यात पंतप्रधान मोदींनी एसआरसीसीच्या योगदानाचे कौतुक केले. या संस्थेने व्यवसाय, सार्वजनिक जीवन आणि समाजातील विविध क्षेत्रांसाठी अनेक पिढ्यांतील नेतृत्व घडवले असल्याचे त्यांनी नमूद केले. सोहळ्यादरम्यान एसआरसीसीच्या शताब्दीनिमित्त १०० रुपयांचे स्मरणार्थ नाणेही जारी करण्यात आले. (PM Narendra Modi)

विशेष म्हणजे, मोदी यांचा एसआरसीसीशी जुना संबंध आहे. २०१३ मध्ये गुजरातचे मुख्यमंत्री असताना त्यांनी या महाविद्यालयाला भेट दिली होती. आता १३ वर्षांनंतर पंतप्रधान म्हणून ते पुन्हा एसआरसीसीमध्ये पोहोचले. मेट्रो प्रवास आणि SRCCच्या शताब्दी सोहळ्यातील सहभागामुळे पंतप्रधान मोदींच्या या दिल्ली दौऱ्याची चांगलीच चर्चा होत आहे. (PM Narendra Modi)