Horrific cargo plane crash : मियामी विमानतळावर ॲमेझॉनच्या कार्गो विमानाचा भीषण अपघात, ५ जणांचा मृत्यू

Horrific cargo plane crash : अमेरिकेतील मियामी आंतरराष्ट्रीय विमानतळावर ॲमेझॉनच्या प्राईम एअर नेटवर्कसाठी (Amazon's Prime Air network) कार्यरत असलेल्या बोईंग मालवाहू विमानाचा भीषण अपघात झाला. विमान धावपट्टीवर उतरल्यानंतर नियंत्रणाबाहेर जाऊन धावपट्टीवरून घसरले आणि अनेक वाहनांना धडकले. त्यानंतर विमानाला भीषण आग लागली. या दुर्घटनेत पाच जणांचा मृत्यू, तर पाच जण जखमी झाले आहेत. जखमींपैकी तिघांची प्रकृती गंभीर असल्याची माहिती आहे.

लँडिंगनंतर विमान धावपट्टीवरून घसरले

वृत्तानुसार, हा अपघात रविवारी स्थानिक वेळेनुसार दुपारी सुमारे २ वाजता झाला. हे विमान पोर्तो रिकोमधील लुईस मुनोज मारिन आंतरराष्ट्रीय विमानतळावरून उड्डाण करून मियामीला पोहोचले होते. मियामी विमानतळावर उतरल्यानंतर विमान धावपट्टीवरून घसरले आणि त्याची अनेक वाहनांना धडक बसली. या वाहनांमध्ये काही लोक अडकले होते. विमानाचा पायलट आणि को-पायलटदेखील कॉकपिटमध्ये अडकल्याची माहिती समोर आली.

२०० हून अधिक आपत्कालीन कर्मचारी घटनास्थळी

अपघाताची माहिती मिळताच मियामी-डेड फायर रेस्क्यूची ६० हून अधिक पथके घटनास्थळी दाखल झाली. बचावकार्य आणि आग नियंत्रणात आणण्यासाठी २०० हून अधिक आपत्कालीन कर्मचारी तैनात करण्यात आले. पथकांनी विशेष फोमचा वापर करून विमानाला लागलेली आग विझवली आणि वाहनांमध्ये तसेच विमानात अडकलेल्या लोकांना बाहेर काढले. अपघातानंतर अनेक तास विमानातून इंधनाची गळती सुरू असल्याचेही सांगण्यात आले. दरम्यान, विमानात नेमके किती जण होते आणि जमिनीवर किती लोक या दुर्घटनेत प्रभावित झाले, याबाबत अधिकाऱ्यांनी अद्याप स्पष्ट माहिती दिलेली नाही.

लँडिंगच्या वेळी विमानाचा वेग २०८ किमी प्रतितास

विमानांच्या हालचालींवर लक्ष ठेवणाऱ्या फ्लाइटरडार २४ या वेबसाइटच्या माहितीनुसार, विमान धावपट्टीच्या वापरण्यायोग्य भागाबाहेर गेले, त्यावेळी त्याचा वेग सुमारे ११२ नॉट्स म्हणजेच जवळपास २०८ किलोमीटर प्रतितास होता. विमान धावपट्टी क्रमांक ३० वर उतरले होते. मात्र, लँडिंगनंतर विमान वेळेत का थांबू शकले नाही, याचे नेमके कारण अद्याप स्पष्ट झालेले नाही.

एअर ट्रॅफिक कंट्रोलच्या रेकॉर्डिंगमध्ये एका जमिनीवरील वाहनाकडून टॉवरला विमानाने धावपट्टी क्रमांक ३० ओलांडल्याची माहिती दिल्याचे समोर आले आहे. प्राथमिक माहितीनुसार, लँडिंगपूर्वी वैमानिकांनी कोणतीही आपत्कालीन परिस्थिती जाहीर केली नव्हती. या अपघाताचे कारण अद्याप अधिकृतपणे निश्चित करण्यात आलेले नाही. FAA या दुर्घटनेची चौकशी करणार असून, राष्ट्रीय वाहतूक सुरक्षा मंडळ (NTSB) देखील घटनेशी संबंधित माहिती गोळा करत आहे.

मियामी विमानतळावरील उड्डाणांवर मोठा परिणाम

या भीषण अपघातानंतर मियामी आंतरराष्ट्रीय विमानतळावरील सर्व धावपट्ट्या आणि टॅक्सीवे काही काळासाठी बंद करण्यात आले. त्यामुळे विमानांची वाहतूक विस्कळीत झाली. एपीच्या माहितीनुसार, रविवारी १६० हून अधिक उड्डाणे रद्द, तर सुमारे ३२५ उड्डाणांना विलंब झाला. नंतर विमानतळावरील काही धावपट्ट्या पुन्हा सुरू करण्यात आल्या. मात्र, अपघातग्रस्त विमानामुळे विमानतळाच्या कामकाजावर काही काळ परिणाम कायम राहिला. दरम्यान, या भीषण अपघातामागचे नेमके कारण काय, विमान लँडिंगनंतर नियंत्रणाबाहेर का गेले आणि दुर्घटनेची परिस्थिती नेमकी कशी निर्माण झाली, याचा तपास FAA आणि NTSBकडून केला जात आहे.