लाहोर : इंग्लंड दौऱ्यातील निराशाजनक कामगिरीनंतर पाकिस्तान क्रिकेट संघात वादंग निर्माण झाले आहे. यादरम्यान, पाकिस्तानचा स्टार क्रिकेटपटू मोहम्मद रिझवान याने 'नॅशनल सायबर क्राईम इन्व्हेस्टिगेशन एजन्सी'ने (NCCIA) बजावलेल्या समन्सला आव्हान देत थेट लाहोर उच्च न्यायालयात धाव घेतली आहे. गेल्या आठवड्यात एजन्सीसमोर चौकशीसाठी हजर राहिल्यानंतर त्याला हे समन्स बजावण्यात आले होते.(Mohammad Rizwan NCCIA case)
नेमके प्रकरण काय?
इंग्लंडविरुद्धच्या कसोटी मालिकेत पाकिस्तानचा ३-० असा दारुण पराभव झाला होता. या मालिकेनंतर चौकशीसाठी NCCIA ने रिझवान आणि त्याचा सहकारी फलंदाज इमाम-उल-हक यांना समन्स पाठवले होते. हे दोघेही एजन्सीच्या लाहोर येथील कार्यालयात हजर झाले होते, जिथे त्यांना चौकशीनंतर अनेक पानांची प्रश्नावली भरून देण्यात आली होती. मिळालेल्या माहितीनुसार, इमाम-उल-हकने १५ सप्टेंबरच्या अंतिम मुदतीपूर्वी एका मध्यस्थाद्वारे आपली उत्तरे सादर केली आहेत. मात्र, मोहम्मद रिझवानने या चौकशीच्या कायदेशीर स्वरूपावर आणि NCCIA च्या अधिकारक्षेत्राच्या व्याप्तीवर प्रश्नचिन्ह उपस्थित करत सोमवारी न्यायालयात याचिका दाखल केली. आपल्यावर कोणताच विशिष्ट आरोप नसताना अशा प्रकारे चौकशीसाठी बोलावण्याच्या एजन्सीच्या अधिकाराला त्याने याचिकेत आक्षेप घेतला आहे.
मुंबई (विशेष प्रतिनिधी) : केंद्र सरकारच्या वतीने राबविण्यात येत असलेल्या ‘एक पेड माँ के नाम’ अभियान अंतर्गत आणि देशाचे पंतप्रधान नरेंद्र मोदी यांच्या ...
प्रश्नावली आणि PCB ची अंतर्गत चौकशी
NCCIA च्या वतीने देण्यात आलेल्या प्रश्नावलीमध्ये क्रिकेटपटूंचा प्रवास, आर्थिक तपशील तसेच वैयक्तिक आणि कारकिर्दीशी संबंधित सविस्तर माहिती मागवण्यात आल्याचे समजते. एजन्सीची ही चौकशी पाकिस्तान क्रिकेट बोर्डाच्या (PCB) स्वतंत्र अंतर्गत चौकशीशी संबंधित आहे का, हे अद्याप स्पष्ट झालेले नाही. खेळाडूंच्या शिस्त आणि वर्तणुकीबाबतच्या प्रसारमाध्यमांमधील वृत्तांची गंभीर दखल घेऊन अंतर्गत शिस्तभंगाची चौकशी सुरू केल्याचे PCB ने गेल्या आठवड्यात जाहीर केले होते. सध्या या प्रकरणाचा अंतर्गत आढावा घेतला जात असून ही संपूर्ण प्रक्रिया 'पीसीबीच्या नियमांनुसार राबवली जात असल्याचे' बोर्डाने स्पष्ट केले होते.(Mohammad Rizwan NCCIA case)
इंग्लंड दौऱ्यातील पराभव आणि संघातील फेरबदल
लॉर्ड्सवर झालेल्या दुसऱ्या कसोटी सामन्यात इंग्लंडकडून १९४ धावांनी पराभव झाल्यानंतर, पाकिस्तानच्या संघातून वगळण्यात आलेल्या आणि मायदेशी परत पाठवण्यात आलेल्या सात क्रिकेटपटूंध्ये रिझवान आणि इमाम यांचा समावेश होता. त्याआधी पाकिस्तानला पहिल्या कसोटी सामन्यात एका डावाने आणि १०३ धावांनी पराभव स्वीकारावा लागला होता. या खराब कामगिरीनंतर पीसीबीने संघात मोठे फेरबदल केले. मुख्य प्रशिक्षक सरफराज अहमद आणि गोलंदाजी प्रशिक्षक उमर गुल यांना पदावरून हटवण्यात आले, तसेच इंग्लंडला सात नवीन क्रिकेटपटू पाठवण्यात आले ज्यात आंतरराष्ट्रीय पदार्पण न केलेल्या पाच खेळाडूंचा समावेश होता. अखेर, एजबॅस्टन येथील तिसऱ्या कसोटी सामन्यातही पाकिस्तानला आठ गडी राखून पराभव पत्करावा लागला. आता खेळाडूंना बजावलेले समन्स आणि उच्च न्यायालयातील याचिकेमुळे पाकिस्तान क्रिकेट वर्तुळात खळबळ उडाली आहे.(Mohammad Rizwan NCCIA case)