Nandurbar News : नंदुरबार जिल्ह्यातील धडगाव तालुक्यातून एक धक्कादायक घटना समोर आली आहे. अक्राणी येथील अनुदानित आश्रमशाळेत दहावीमध्ये शिकणाऱ्या 15 वर्षीय विद्यार्थिनीने विषारी औषध प्राशन केल्याची घटना घडली. उपचारासाठी रुग्णालयात दाखल केल्यानंतर उपचारादरम्यान तिचा मृत्यू झाला.
उपचारादरम्यान विद्यार्थिनीचा मृत्यू
पोलिसांनी दिलेल्या माहितीनुसार, धडगाव तालुक्यातील अक्राणी येथे सातपुडा शिक्षण प्रसारक मंडळ, विद्यावाडी, जि. धुळे संचलित अनुदानित आश्रमशाळेत ही घटना घडली. संबंधित विद्यार्थिनी दहावीच्या वर्गात शिक्षण घेत होती. विषारी औषध प्राशन केल्यानंतर तिची प्रकृती बिघडल्याने तिला तातडीने धडगाव ग्रामीण रुग्णालयात उपचारासाठी दाखल करण्यात आलं. मात्र, उपचारादरम्यान तिचा मृत्यू झाला.
मृत्यूचं कारण अद्याप अस्पष्ट
घटनेची माहिती मिळताच विद्यार्थिनीच्या कुटुंबीयांनी रुग्णालयात धाव घेतली. यावेळी कुटुंबीयांचा आक्रोश हृदय पिळवटून टाकणारा होता. दरम्यान, विद्यार्थिनीने हे टोकाचं पाऊल का उचललं, याचं कारण अद्याप स्पष्ट झालेलं नाही. या प्रकरणी धडगाव पोलीस ठाण्यात आकस्मिक मृत्यूची नोंद करण्यात आली आहे. विद्यार्थिनीच्या मृत्यूमागील नेमकं कारण काय, याचा तपास धडगाव पोलीस करत आहेत.