Nashik Ring Road : सिंहस्थ कुंभमेळ्याच्या पार्श्वभूमीवर नाशिकच्या बहुचर्चित परिक्रमा मार्ग अर्थात रिंग रोडच्या कामाला अखेर वेग आला आहे. तब्बल 66 किलोमीटर लांबीचा हा रिंग रोड सात टप्प्यांत अर्थात पॅकेजमध्ये बांधण्यात येत असून, आता सातही टप्प्यांमध्ये काम सुरू झाल्याची माहिती नाशिक-त्र्यंबकेश्वर कुंभमेळा प्राधिकरणाकडून ( Nashik-Trimbakeshwar Kumbh Mela Authority ) देण्यात आली आहे. दरम्यान, भूसंपादनासाठी नाशिक जिल्हाधिकारी कार्यालयाला ( Nashik District Collector's Office )आणखी 500 ते 550 कोटी रुपयांचा निधी चालू सप्ताहात उपलब्ध करून दिला जाणार असल्याची माहिती कुंभमेळा आयुक्त शेखर सिंह यांनी दिली आहे.
25 गावांतून जाणार 66 किमीचा रिंग रोड
नाशिक शहरातील वाहतूक कोंडी कमी करण्याच्या उद्देशाने सिंहस्थ कुंभमेळ्याच्या नियोजनात नाशिक परिक्रमा मार्गाला अर्थात रिंग रोडला मान्यता देण्यात आली आहे. हा सुमारे 66 किलोमीटरचा मार्ग 25 गावांतून जाणार आहे. या प्रकल्पासाठी सुमारे 365 एकर खासगी जमीन संपादित करण्यात येत आहे. मात्र, मोजणी, मोबदला आणि रस्त्याच्या संरेखनासह विविध मुद्द्यांवर काही शेतकऱ्यांनी हरकती घेत आंदोलनं केली होती.
Nashik Crime News : नाशिकच्या गंगापूर रोडवर रात्रीच्या अंधारात दुभाजकावरील झाडांची कत्तल केल्याचा धक्कादायक प्रकार उघडकीस आला आहे. जाहिरात फलक स्पष्ट दिसावा ...
24 गावांत थेट खरेदीचे प्रस्ताव
कुंभमेळ्याला आता कमी कालावधी शिल्लक असल्याने प्रशासनाकडून शेतकऱ्यांशी संवाद साधत भूसंपादन प्रक्रियेला गती देण्याचे प्रयत्न सुरू आहेत. गोवर्धन वगळता उर्वरित 24 गावांमध्ये थेट खरेदीचे दर निश्चित करून त्यासंबंधी प्रस्ताव मांडण्यात आले आहेत. तर सक्तीच्या भूसंपादनाचे अवॉर्ड आतापर्यंत आठ गावांमध्ये जाहीर झाले असून, इतर गावांमध्ये ही प्रक्रिया सुरू आहे. महाराष्ट्र राज्य पायाभूत सुविधा विकास महामंडळ अर्थात एमएसआयडीसीच्या माध्यमातून खासगी वाटाघाटी करून थेट खरेदी पद्धतीनेही जमीन संपादन सुरू आहे.
आतापर्यंत 100 हेक्टरपेक्षा अधिक जमीन खरेदी
वरिष्ठ अधिकाऱ्यांच्या माहितीनुसार, आतापर्यंत जवळपास एक हजार कोटी रुपये किमतीची 100 हेक्टरपेक्षा अधिक जमीन थेट खरेदी पद्धतीने संपादित करण्यात आली आहे. आडगाव परिसरात मोठ्या प्रमाणावर जमीन खरेदी करण्यात आल्याची माहिती आहे. भूसंपादन प्रक्रियेतील अडचणी जिल्हाधिकारी आयुष प्रसाद यांच्या माध्यमातून सोडवण्यात येत असल्याचं सांगण्यात आलं आहे. उर्वरित अडचणी आणि प्रश्नांवर जिल्हाधिकारी तसेच संबंधित अधिकारी एकत्रितपणे तोडगा काढतील, असं कुंभमेळा आयुक्त शेखर सिंह ( Kumbh Mela Commissioner Shekhar Singh) यांनी स्पष्ट केलं.
सातही पॅकेजमध्ये प्रत्यक्ष कामाला सुरुवात
भूसंपादन प्रक्रियेला वेग आल्यानंतर रिंग रोडच्या सर्व सात पॅकेजमध्ये काम सुरू झालं आहे. यापूर्वी काही टप्प्यांमध्ये काम सुरू होतं; मात्र अलीकडे आणखी एक-दोन टप्प्यांमध्ये कामाला सुरुवात झाली आहे. कुंभमेळा आयुक्त शेखर सिंह यांच्या माहितीनुसार, नाशिक परिक्रमा मार्गाचं काम आता सातही टप्प्यांमध्ये सुरू झालं असून ही समाधानाची बाब आहे.
दरम्यान, भूसंपादनासाठी मोबदला वितरणाची अंतिम टप्प्यातील प्रक्रिया सुरू आहे. जिल्हाधिकारी कार्यालयाच्या मागणीनुसार चालू सप्ताहात 500 ते 550 कोटी रुपयांचा निधी उपलब्ध करून दिला जाणार आहे. उर्वरित अवॉर्डसाठी निधीची मागणी प्राप्त झाल्यानंतर प्राधिकरणाकडून आवश्यक निधी उपलब्ध करून दिला जाणार असल्याचंही सिंह यांनी सांगितलं.