Nashik Water Supply : नाशिक शहराचा विस्तार वेगाने होत असताना वाढत्या उपनगरांमधील पाणीपुरवठा व्यवस्था सक्षम करण्यासाठी नाशिक महापालिकेने महत्त्वाचे पाऊल उचलले आहे. केंद्राच्या ‘अर्बन चॅलेंज फंड’ (UCF) अंतर्गत शहरातील विविध भागांत सहा नवीन उच्चस्तरीय जलकुंभ, जलवाहिन्या आणि वितरण व्यवस्थेशी संबंधित कामे करण्यात येणार आहेत. यासाठी तब्बल 28 कोटी 14 लाख 98 हजार 707 रुपयांच्या प्रस्तावाला महासभेने मंजुरी दिली आहे.
2055 पर्यंतची लोकसंख्या गृहीत धरून नियोजन
शहराच्या बाह्य भागात झपाट्याने वाढणारी नागरी वस्ती आणि भविष्यातील पाण्याची वाढती मागणी लक्षात घेऊन हा आराखडा तयार करण्यात आला आहे. सन 2055 पर्यंतची संभाव्य लोकसंख्या विचारात घेऊन पाणीपुरवठा यंत्रणेची क्षमता वाढवण्याचा प्रयत्न या प्रकल्पातून करण्यात येणार आहे. केंद्राच्या गृहनिर्माण व शहरी व्यवहार मंत्रालयाच्या UCF योजनेंतर्गत महाराष्ट्रातील तीन प्रकल्पांना मंजुरी मिळाली असून, त्यासाठी केंद्राकडून 497.37 कोटी रुपयांचा सहाय्य निधी उपलब्ध झाला आहे. त्यामध्ये नाशिक महापालिकेच्या पाणीपुरवठा विभागाच्या सुमारे 100 कोटी रुपयांच्या प्रकल्पाचाही समावेश आहे.
Nashik Crime News : नाशिकच्या गंगापूर रोडवर रात्रीच्या अंधारात दुभाजकावरील झाडांची कत्तल केल्याचा धक्कादायक प्रकार उघडकीस आला आहे. जाहिरात फलक स्पष्ट दिसावा ...
मुकणे धरणाच्या पाणीपुरवठा योजनेलाही चालना
या व्यापक प्रकल्पामध्ये मुकणे धरण योजनेतील विल्होळी येथील 274 एमएलडी क्षमतेच्या जलशुद्धीकरण प्रकल्पासह शहरातील विविध भागांत पाणीपुरवठ्याच्या पायाभूत सुविधा उभारण्याचे नियोजन आहे. प्रस्तावित सहा जलकुंभांची प्रत्येकी 20 लाख लिटर क्षमता असणार असून, त्यांची स्टेजिंग हाइट 20 मीटर राहणार आहे. सातपूर, नवीन नाशिक, पंचवटी, नाशिक पूर्व, नाशिकरोड आणि नाशिक पश्चिम या विभागांतील विविध भागांमध्ये ही कामे केली जाणार आहेत.
कुठे होणार नवीन जलकुंभ?
- सातपूर – पिंपळगाव बहुला शिवार: 20 लाख लिटर जलकुंभ आणि जलवाहिन्या
- नवीन नाशिक – पाथर्डी शिवार: 20 लाख लिटर जलकुंभ आणि जलवाहिन्या
- पंचवटी – हिरावाडी, शक्तीनगर: 20 लाख लिटर जलकुंभ आणि वितरण पाइपलाइन
- नाशिक पूर्व – नाशिक शिवार: 20 लाख लिटर जलकुंभ आणि वितरण वाहिन्या
- नाशिकरोड – देवळाली शिवार, दुर्गा उद्यान: 20 लाख लिटर जलकुंभ आणि जलवाहिन्या
- नाशिक पश्चिम – महात्मा नगर: 20 लाख लिटर जलकुंभ
- सातपूरमधील अतिरिक्त काम – सुला चौक ते आशीर्वाद नगर: ESR साठी फीडिंग पाइपलाइन
वाढत्या लोकसंख्येसोबत शहरातील पाण्याची गरजही वाढत असल्याने या पायाभूत सुविधांमुळे भविष्यातील पाणीपुरवठ्याचे नियोजन अधिक सक्षम करण्याचा महापालिकेचा प्रयत्न आहे.
