SIM Card Fraud : तुमचे सिमकार्ड आणि मोबाईल हँडसेट सुरक्षित आहेत का? IMEI क्रमांकाची सत्यता तपासण्याचे दूरसंचार विभागाचे आवाहन

मुंबई : बनावट कागदपत्रांच्या आधारे सिमकार्ड मिळवणे, मोबाईल कनेक्शनचा गैरवापर करणे आणि हँडसेटच्या IMEI क्रमांकात अनधिकृत छेडछाड करणे यापासून नागरिकांनी सावध राहावे, असे आवाहन दूरसंचार विभाग, मुंबईने केले आहे. दूरसंचार अधिनियम, २०२३ अंतर्गत अशा गैरप्रकारांसाठी तीन वर्षांपर्यंत कारावास आणि ५० लाख रुपयांपर्यंत दंडाची तरतूद असल्याचे विभागाने स्पष्ट केले आहे. (SIM Card Fraud)

बनावट कागदपत्रांद्वारे २५ मोबाईल कनेक्शन सक्रिय

दूरसंचार विभागाच्या माहितीनुसार, छत्तीसगडमध्ये एका पॉइंट ऑफ सेल (PoS) एजंटने नागरिकांच्या संमतीशिवाय त्यांच्या ओळखपत्रांचा वापर करून २५ मोबाईल कनेक्शन्स बेकायदेशीररीत्या सक्रिय केल्याचे आढळले. या प्रकरणात संबंधित एजंटला ब्लॅकलिस्ट करण्यात आले. तसेच संशयास्पद मोबाईल क्रमांकांची पुनर्पडताळणी करून आवश्यकतेनुसार ते निष्क्रिय करण्यात आले आहेत.

सिमकार्ड आणि मोबाईल वापरताना काय काळजी घ्यावी?

नागरिकांनी आपल्या नावावर जारी केलेले सिमकार्ड इतरांना देणे किंवा हस्तांतरित करणे टाळावे. बनावट कागदपत्रे किंवा दुसऱ्या व्यक्तीची ओळख वापरून सिमकार्ड मिळवू नये. तसेच छेडछाड केलेले IMEI क्रमांक असलेली उपकरणे आणि बदल करता येणारे SIM Box वापरू नयेत, असे आवाहन करण्यात आले आहे. (SIM Card Fraud)

याशिवाय, Calling Line Identity (CLI) किंवा इतर दूरसंचार ओळख क्रमांकांमध्ये अनधिकृत बदल करू नयेत. सायबर फसवणूक किंवा अन्य बेकायदेशीर कृत्यांसाठी सिमकार्ड उधार देणे अथवा भाड्याने देणेही टाळावे.

‘संचार साथी’ पोर्टलद्वारे करा मोबाईल कनेक्शनची पडताळणी

नागरिकांना त्यांच्या नावावर किती मोबाईल कनेक्शन्स जारी करण्यात आली आहेत, याची माहिती ‘संचार साथी’ पोर्टल आणि मोबाईल ॲपच्या माध्यमातून तपासता येते. आपल्या परवानगीशिवाय जारी केलेले किंवा वापरात नसलेले कनेक्शन आढळल्यास त्याची तक्रार नोंदवून ते ब्लॉक करण्याची सुविधाही उपलब्ध आहे. (SIM Card Fraud)

या प्लॅटफॉर्मवर मोबाईल हँडसेटच्या IMEI क्रमांकाची सत्यता पडताळता येते. त्याद्वारे उपकरणाचा ब्रँड, मॉडेल आणि उत्पादक यांसारखी माहिती तपासता येते.

संशयास्पद कनेक्शन आढळल्यास त्वरित कळवा

सिमकार्ड आणि IMEI क्रमांक हे डिजिटल ओळखीचे महत्त्वाचे घटक असल्याने नागरिकांनी त्यांची नियमित पडताळणी करावी आणि सुरक्षितता जपावी, असे दूरसंचार विभाग, मुंबईने म्हटले आहे. आपल्या ओळखपत्रांचा गैरवापर होणार नाही, याबाबतही सतर्क राहण्याचे आवाहन करण्यात आले आहे.

कोणतेही संशयास्पद किंवा अनधिकृत मोबाईल कनेक्शन आढळल्यास नागरिकांनी तातडीने संबंधित दूरसंचार सेवा प्रदात्याला किंवा कायदा अंमलबजावणी यंत्रणेला माहिती द्यावी.
‘संचार साथी’ पोर्टल: [www.sancharsaathi.gov.in](http://www.sancharsaathi.gov.in)