Nashik Dr Manisha Jejurkar Death Case : डॉ. मनीषा जेजुरकर यांच्या मृत्यूच्या आदल्या दिवशी नेमकं काय घडलं ? तपासात नवी माहिती समोर

Nashik Dr Manisha Jejurkar Death Case : गंगापूर रोडवरील रेवती ब्ल्यू अपार्टमेंटमध्ये ६ मार्च २०२६ रोजी डॉ. मनीषा जेजुरकर यांचा मृत्यू झाला होता. या प्रकरणात त्यांच्या बहीण रोहिणी थोरात यांच्या फिर्यादीवरून पती डॉ. नीलेश जेजुरकर यांच्याविरोधात गुन्हा दाखल करण्यात आला आहे. फिर्यादीत डॉ. स्वाती चव्हाण यांच्या नावाचाही उल्लेख आहे. सध्या डॉ. नीलेश जेजुरकर आणि डॉ. स्वाती चव्हाण दोघेही न्यायालयीन कोठडीत असून, तपासादरम्यान मनीषा यांच्या मृत्यूच्या आदल्या दिवशी घडलेल्या काही घटनांची माहिती समोर आली आहे.

दोघांचे मोबाइल फॉरेन्सिक तपासणीसाठी

या प्रकरणाच्या तपासात पोलिसांनी डॉ. नीलेश जेजुरकर आणि डॉ. स्वाती चव्हाण यांचे मोबाइल जप्त केले आहेत. हे मोबाइल फॉरेन्सिक तपासणीसाठी पाठवण्यात आले असून, त्यातून दोघांमधील संपर्क आणि इतर तपासासाठी महत्त्वाची माहिती मिळते का, याचा तपास केला जात आहे. सध्या दोघांना न्यायालयीन कोठडी सुनावण्यात आली आहे. फॉरेन्सिक अहवाल आणि तपासातील पुढील निष्कर्षांच्या आधारे पोलिसांकडून पुढील कायदेशीर प्रक्रिया केली जाणार असल्याची माहिती आहे.

लग्नसमारंभातील घटनेनंतर दुसऱ्याच दिवशी मृत्यू

तपासादरम्यान ५ मार्च रोजी एका लग्नसमारंभात डॉ. मनीषा यांचा सार्वजनिकरित्या अपमान झाल्याचा दावा तपास यंत्रणेकडून केला जात आहे. या घटनेनंतर दुसऱ्याच दिवशी म्हणजे ६ मार्च रोजी त्यांचा मृत्यू झाला. पती डॉ. नीलेश आणि डॉ. स्वाती यांच्यात कथित जवळीक असल्याचा आरोप मनीषा यांच्या कुटुंबीयांकडून करण्यात आला आहे. या पार्श्वभूमीवर लग्नसमारंभातील घटना आणि त्यानंतर मनीषा यांच्या मृत्यूमध्ये काही संबंध होता का, याचा तपास पोलिसांकडून केला जात आहे. मात्र, या दोन्ही घटनांमध्ये थेट कारणसंबंध असल्याचे अद्याप निश्चित झालेले नाही.

कुटुंबीयांच्या आरोपांचीही पोलिसांकडून पडताळणी

मनीषा यांनी बहिणीला सांगितले होते की, गेल्या दोन वर्षांपासून डॉ. नीलेश आणि डॉ. स्वाती यांचे एकमेकांच्या घरी येणं - जाणं वाढलं होतं. त्यामुळे दिवाळीत मनीषा आई-वडिलांकडे आली असताना तिनं ‘पती नीलेश विनाकारण त्रास देत आहे’, असं सांगितलं अन् बहिणीला सांगितलं की, 'तुझ्या दाजीचं वागणं खूप बदललं आहे'. तसेच मी खूप निराश झाले असून पुढे जगण्याची इच्छा संपली आहे, माझ्या मुलीचा सांभाळ कर, असं मनीषा आपल्या बहिणीला म्हणाली होती.

प्रकरणाचा पुढील तपास सुरू

दिवाळीच्या काळात आई-वडिलांकडे आल्यानंतर मनीषा यांनी पतीच्या बदललेल्या वर्तनाबद्दल बहिणीकडे बोलल्याचेही कुटुंबीयांनी सांगितले आहे. आपण निराश असल्याचे आणि मुलीच्या भवितव्याबाबत चिंता व्यक्त केल्याचेही त्यांच्या बहिणीचे म्हणणे आहे. या सर्व बाबींची पोलिसांकडून चौकशी केली जात असून, मोबाइल फॉरेन्सिक अहवाल, साक्षीदारांचे जबाब आणि उपलब्ध इतर पुराव्यांच्या आधारे प्रकरणाचा पुढील तपास सुरू आहे. त्यामुळे मनीषा यांच्या मृत्यूमागील नेमकी परिस्थिती तपासातून स्पष्ट होणार आहे.